AI.XR - VR Experiences Center

Chak Lun Jackie Hon 2 年前

同小朋友weekend黎玩VR, 場地佈置幾有氣氛,特別門口恐龍同鬼屋幾有feel。職員好有禮貌,遊戲前都會講解清楚, 特別一個長髮女職員好細心 小朋友頭唔夠大會幫佢墊毛巾。如果遊戲種類再多元化會更好👍

Pinky Lee 5 年前

平時返工放工經過D2 PLACE 都見到樓下嗰層有間VR Shop好想走入去玩下，男友今日嚟接我放工話帶我去玩...其實我知佢都好想玩。 呢度氣環境唔錯，入面仲有好多打卡位添。 每玩一個game都要1張遊戲券，如果1張就＄140，2張就＄200，3張就＄220，買得越多就越抵。我哋2個人total 買咗4張遊戲券，可以玩到2個game。 呢度唔單止有得玩，凡購買任何遊戲券仲有得任飲添呀，你無睇錯呀，係任飲呀，有可樂、芬達、雪碧、水都可以，非常貼心安排，可以玩完一個休息下飲下嘢。 呢度有刺激VR系列同埋啱小朋友玩嘅動漫VR系列。我哋當然係揀刺激VR系列，佢有6款game，有3款都係喪屍射擊，一款就係合作射擊，一款係多人射擊，仲有最後一款就係恐懼鬼屋。 原本我同男友都想揀恐懼鬼屋，不過要多人先玩到，最後我地揀左兩個喪屍遊戲。一個係生化煉獄，另一個係失控地鐵。 喺玩之前仲可以戴上即棄眼罩，然後先戴VR眼鏡，確保衛生。 我哋先玩生化煉獄，每人都要拎上一支槍，支槍對於女仔嚟講都幾重下㗎，玩完隻手都好攰！呢個game主要係喺監獄入面射殺唔同嘅喪屍，記緊要兼顧上下左右，一眼關七呀！玩得勁仲可以見到爆機畫面，大家要努力啲啦！玩完之後仲會出分紙，咁就可以同你partner比試一下啦～ 之後就喺public area玩失控地鐵，因為呢個game要少少走動，所以需要嘅空間都要大啲。呢個game可以完完全全感受到4D體驗，真係feel到好似有喪屍拍你膊頭咁，相當迫真。仲可以感受到真係好似上咗地鐵射殺喪屍咁，畫面超正。呢度啲店員仲好好人，可以比部電話佢哋幫你一路玩一路幫你拍video。 呢2個games都好好玩，故事緊湊，畫面好靚，場面夠晒迫真，好適合一大班friend嚟玩。

Carrie Tsang 6 年前

一直很想去玩 VR Game, 碰巧幾天都落雨，室內活動啱曬， 趁小朋友仲未復課 一於出動 🤓平日下午時間冇咁多人。 去了D2 Place ONE 1樓 VAR LIVE， 有大概十幾款遊戲， 大人細路，親子嘅類型都有， 攻略，射擊， 賽車，鬼怪，打喪屍。。 費用方面 : $220 有三张遊戲卷，$200 二张 ＆$140一张。 買咗遊戲券更可以任飲非酒精飲品， 一班朋友中途休息坐吓飲吓嘢夠爽! 🥤🥤  玩唔曬都唔使驚， 留返張券可以下次再用。 一場嚟到梗係揀啲觀感刺激喪驚喪嗌嘅game ～ 《失控地鐵 ⚡Zombie Way》 - 呢款係必玩嘅game， 幾個人玩更加刺激， 我見同場都有小朋友玩， 阿囝話要挑戰一吓同埋要屍殺列車嘅感覺😌。 咁我哋 join 埋另外兩個年青人玩， 咁就唔使再等下一場 。裝備都好重，孭住一個 notebook 嘅物體， headphone, VR 鏡， 仲有支機關槍。 工作人員會講解一次， 支槍點用 ，有咩秘技，過程係點， 故事背景。 最重要係啟動了自動復活模式直至故事完結， 其中一個 end game 咗遊戲都唔會立刻終結～ 小朋友第一次玩VR game, 係咁嗌好驚 但又要玩， 工作人員都要捉住佢驚佢走咗去第度。 佢之後話畀我聽太驚就會合埋眼🤣😨 淨係開槍， 咁樣都唔game over～😆 的確場景好真實， 啲喪屍無處不在， 機關槍掃射之下真係好減壓～ 最強實咁就係月台上列車之後， 配合車速地板都隨之震動， 真係有啲似上咗屍殺列車， 陰森恐怖又刺激！😱💀☠️ 🌌🌌🌠 消耗完一輪體力， 這個game 《怪怪屋⚡ Mystery House》只需要坐喺度😆， 等我可以回一回氣。😁 參與人數最好至少四位， 故事比較簡單, 較多感受氣氛。因為冇其他人join 我哋兩個玩， 其餘兩個玩家係電腦。Anyway 係幾好玩嘅親子遊戲， 也講求合作， 不過玩嘅時間相對就比較短。

思思妍 6 年前

打喪屍 刺激體驗VR Game 思思成日話要去打機，今個星期考完試 就同佢去咗D2 Place一齊玩VR game。這間VAR Live 地方很大 ，目測起碼超過2000呎，原來佢分店遍佈中國、台灣、馬來西亞等地，非常出名！ 呢度有十幾款VR game，全部自家研發， 配合遊戲場景佈置，收費單人280蚊可玩3款遊戲，大約歸類為 打喪屍、互相對戰 、鬼屋和親子遊戲。 識玩梗係要打喪屍啦！店員好貼心會介紹每個game嘅特色和玩法，協助配戴裝備。我哋玩咗招牌遊戲 [失控地鐵] ，喪屍從四方八面湧出，我哋要不停打喪屍，趕上最後一班開出嘅列車，場面震撼，立體逼真， 驚慄恐怖！真係打到手軟！ 之後又體驗咗親子 [Baby Shark] 輕鬆唱遊跳舞，適合較細小朋友嘅親子VR遊戲！玩到意猶未盡，但係已經好攰，這裏還有餐廳吧檯，提供小食和飲品讓人歇息，真係一個玩樂嘅好地方！

Kary 6 年前

行街行到悶，又冇戲好睇，兩個人拍拖唔知去邊度好，一時興起就黎到位於荔枝角D2 Place既VR電競館。粗略估計呢度至少有14款遊戲，有刺激既打喪屍系列，有驚心動魄嘅鬼屋，亦都有老少咸宜既小遊戲。無論係一大班朋友，定係情侶二人世界，呢到都係一個唔錯嘅地方。 我哋所購買嘅套票係包三款遊戲既，每人會獲得一張卡仔。每次想玩咩遊戲，只要遞張卡仔比職員，同職員講聲要玩咩遊戲就得。 第一個遊戲就揀咗生化煉獄1，職員搵咗另一組情侶同我地一齊玩。呢個遊戲係獨立有間房既，入面有唔同嘅槍械裝備任君選擇。每款裝備嘅操作方式同威力都唔同，我就揀咗最輕量最易上手既手槍。今次係我第一次玩VR，咩都唔識，好彩職員都好細心咁講解遊戲玩法，所以唔需要擔心唔識玩呢個問題。 遊戲方面都幾易上手，四位玩家身處係監獄之中，而喪屍同蝙蝠會係四方八面咁襲來，玩家既任務就係擊退喪屍。遊戲刺激感同流暢度都唔錯，打中左仲有爆頭效果，玩落好暢快。 之後我哋就被呢個充滿日式風格嘅畫面吸引左，玩家可以成為忍者角色，拎起弓箭同埋刀劍同怪物決一死戰，啲怪物造型相當可愛，好啱女仔玩，而且遊戲入面仲有幾個唔同嘅場景轉換，幾有趣，不過如果弓箭個玩法再豐富啲就更好。 一場黎到當然要玩下鬼屋，除咗傳統恐怖嘅女鬼之外，仲有BB版本嘅《怪怪屋》，兩種遊戲嘅玩法大同小異，但係畫面風格就完全相反。今次就揀咗《魂飛魄散》，遊戲入面要同女鬼對視黎獲得勝利，要躲避女鬼嘅追殺，就需要依賴隊友嘅提示，齊心合力先可以贏。地板同埋場景都會有震動效果，令到遊戲體驗更加逼真。 今次有一個唔錯嘅遊戲體驗，美中不足嘅係比較多人，排隊需時，可能等候時間會比較長。撇除呢一點，成個遊戲體驗都唔錯，有機會都會嚟試埋其他遊戲。