Undici

wuso_foodie 3 個月前

🔸秘撈薯條 薯條炸到金黃色脆卜卜，上面灑咗勁多辣辣地嘅粉，極度惹味。外脆內軟，食落好過癮，直情係送嘢飲一流嘅邪惡小食。 🔸黑松露三文魚忌廉意粉 今日個廚師發辦（$128）幾有驚喜。個忌廉汁勁掛汁，每條意粉都沾滿黑松露碎，菇味同奶香爆棚。上面仲擺咗幾片煙三文魚捲到好似朵花噉，配埋芝士碎一齊食，口感勁濃郁。 🔸鰻魚意大利飯 呢碟飯（$158）賣相超誇張，成大條鰻魚鋪喺面，燒到油亮焦香、肉質好嫩滑。下面夾埋滑蛋同大量木魚絲，Risotto 索晒啲鹹鹹甜甜嘅醬汁，啖啖都好豐富，極之飽肚。 🔸升級套餐（凍檸茶、抹茶及柚子芝士蛋糕） 每個主菜加 $38 嗌埋 Set 認真划算。凍檸茶擺咗厚切檸檬片，飲落夠晒爽、去到膩。兩件芝士蛋糕都好高質，抹茶嗰件茶味回甘、質感幾綿密；柚子嗰件就帶點微酸果香，成餐飯食完個胃舒服晒。

E’s Travelogue 3 個月前

招牌名古屋鰻魚大阪燒意大利飯 (HK$158) 原條鰻魚超大塊兼肥美! Risotto煮得啱啱好有咬口. 配埋爆多木魚絲同滑蛋, 好好食! . 明太子意大利粉配帆立貝 (HK$128) 上面有蟹柳、帆立貝、磨菇、勁多紫菜同蟹籽. 意粉掛滿明太子醬. 加埋蟹籽卜卜脆嘅層次感. 惹味到令人一啖接一啖! 味道比Risotto更濃. 值得一試! . 抹茶豆腐鮮奶 （+HK$48) 鍾意飲抹茶嘅一定要試! 抹茶味濃郁之餘, 飲到豆腐溶嘅綿密感. 口感好特別. . Oreo朱古力 (+HK$48) 賣相勁邪惡. 朱古力同Cream味超濃. 飲完真係要即刻去做下運動! . 焦糖海綿蛋糕 蛋糕勁軟熟. 中間嘅焦糖醬夾心好重焦糖味. 蛋糕面有杏仁片. 所以整體食落有微脆口感. . 柚子芝士蛋糕 食到柚子味. 芝士好滑. 細細件完全唔膩. . 整體嚟講, 主菜高質. 飲品好啱打卡. 連甜品都有驚喜! 最正係飲品同蛋糕都唔會太甜. . 喺銅鑼灣諗唔到食咩. 嚟呢度食絕對唔會失望! 不過Cafe 座位唔多, 建議大家先Book位再去!

li foodielamlam 3 個月前

今日去咗銅鑼灣「Undici」日系隱細樓上Cafe，全部嘢食都好IGable，賣相非常吸引，打卡一流。 平時一至四+ $28仲有自選蛋糕放題🤩 有6款蛋糕任食 抹茶芝士蛋糕 焦糖海綿蛋糕 柚子芝士蛋糕 榛子海綿蛋糕 朱古力芝士蛋糕 原味芝士蛋糕 🍟 秘撈薯條 ($58) 薯條炸得到金黃香脆，表面勁多調味粉，少少辣辣地好惹味，絕對係會令人食完一啖又一啖👍 🍝 明太子意大利粉 ($128) 一上枱賣相勁吸引，勁濃郁嘅醬汁，頂層鋪滿左鮮艷嘅蟹籽，大量的紫菜碎仲有大量蟹柳做點綴❤️撈左醬汁後，口感勁幼滑層次好豐富，每一啖都食到魚籽爆開嘅口感🥳 🍛 關西牛肉意大利飯 ($138) 底部嘅意大利飯吸滿醬汁，上面鋪滿了勁多塊的關西牛肉片，全部大大塊，頂部再放上生洋蔥絲同蔥絲，淡淡勁滿足🤩仲中和左意大利飯同牛肉的油膩感，平衡得唔錯👍 我同朋友星期日嚟，都可以+$48 自選飲品+自選蛋糕 我哋兩個人叫左兩set 🥭芒芒甘露 頂層有一層厚厚嘅奶蓋，仲有好靚嘅精緻食用花瓣，芒果同柚子好清新解膩 🍵抹茶豆腐鮮奶 勁靚嘅漸層同奶泡，抹茶味濃郁，賣相亦好「IGable」 抹茶芝士蛋糕🍰 抹茶味都幾香，質地比較結實~ 最中意佢面頭撒上咗燕麥脆脆同埋紅莓碎，勁有爽脆口感，層次感加分！✨ 柚子芝士蛋糕🍰 柚子同芝士係最夾嘅組合！柚子天然嘅微酸同清香金到蛋糕食落清爽輕盈。頂層同樣配有脆脆，令每一啖都有唔同嘅驚喜。 📍 Undici (銅鑼灣) 銅鑼灣耀華街3號百樂中心11樓1101A-B號舖

Pang Nga Wing 3 個月前

之前上網都留意到呢間Cafe嘅芝士蛋糕相當吸引，有多款口味，幾十蚊就可以將主菜升級套餐，一次過享用蛋糕同埋飲品💕 蒜香辣椒蜆肉意大利粉配軟殼蟹 軟殼蟹炸得好香脆，意粉充滿蒜香同微辣，配埋鮮甜嘅蜆肉，好惹味開胃 明太子意粉配珍珠帶子 明太子醬好 creamy 且鹹香十足，珍珠帶子仔細粒但爽口，整體濃郁得嚟唔會膩 抹茶豆腐鮮奶 抹茶回甘配鮮奶好順滑，底層嘅滑豆腐多咗份豆香，口感豐富、甜度啱啱好 芒芒甘露 芒果味濃郁，飲落好清爽開胃，好適合夏天飲 抹茶芝士蛋糕 質地可以參考圖片，抹茶嘅香味同芝士嘅奶香夾得好好，唔會過甜 柚子芝士蛋糕 柚子嘅清酸完美中和咗芝士嘅厚重感，味道好清新，會不停想食下一啖😆

水豚覓食日記 4 個月前

銅鑼灣啲Café真係多到試唔晒，晏晝都幾多人，所以建議訂枱。但係坐就坐得好舒服，啱晒小人聚會。餐牌有少少唔同咗，加$48就會有嘢飲加個蛋糕仔，其實嘢飲普遍都係$40＋，所以絕對會推薦大家嗌個套餐。 ‣ 明太子意大利粉配帆立貝 $128 幾多帶子仔喺入面，我覺得個明太子醬做得幾好，唔會話好甜好漏。 ‣ 蒜香辣椒蜆肉意大利粉配軟殼蟹 $138 軟殼蟹原隻上個視覺效果真係好唔錯，我哋鍾意佢嘅醬汁，我覺得有啲似比較甜嘅冬陰功，但係辣辣地食落都幾開胃。啲蜆肉嘅份量都唔少，食到最尾都仲有幾多蜆肉淨。 ‣ 蜂蜜蒜蓉雞翼 $58 雞翼炸得脆卜卜，出面個浸蜂蜜嘅份量啱啱好，唔會話太甜，本身雞翼都有調味，令我諗返起BBQ嗰陣嘅蜜糖雞翼，我個人幾鍾意，但如果蒜蓉味更加濃郁就好啦。 ‣ 「朱爺」咖啡 成餐飯入面最鍾意就係呢杯咖啡，佢係朱古力雪糕再加椰子雪糕，所以當椰子雪糕溶喺咖啡入面嗰陣，真係有種飲緊椰奶latte嘅感覺，其後加埋朱古力雪糕，就會有種飲緊朱古力嘅感覺，私心推薦大家嗌。 ‣ 抹茶豆腐鮮奶 其實最鍾意係飲到奶味，亦都有豆嘅香味，成杯飲落去好舒服，我自己個人會鍾意抹茶再濃郁啲，不過而家咁都幾舒服。 ‣ 焦糖海綿蛋糕 & 日式原味芝士蛋糕 有幾間Café都有做任食蛋糕，不過唯獨是呢一間有海綿蛋糕，我自己就比較鍾意食芝士蛋糕，始終個口感比較濃郁，但相信唔少人都鍾意海綿蛋糕嗰種鬆軟嘅口感，平日加$28可以任食，蛋糕自由都幾開心。