Harlan's

Cooking 365 2 個月前

The One 19樓原來有一間高級餐廳Harlan’s。今晚閨蜜約我來這裏慶祝生日，令我受寵若驚。 北海道帶子他他配火龍果脆片 北海道帶子的鮮甜與火龍果的清爽搭配，讓人瞬間被吸引。脆片的口感增添了層次感，完美展現了海洋的鮮味。 日本帝王蟹蛋泡沫配24個月法國康帝芝士脆片及海膽 日本帝王蟹蛋泡沫，搭配法國康帝芝士脆片及海膽，則將海味與奶香巧妙融合。 甜酸伊比利亞脆豬面頰配煎生蠔及荔枝 伊比利亞脆豬面頰慢煮至嫩滑，結合了煎生蠔的濃郁和荔枝的清甜，每一口都令人驚喜。 西班牙八爪魚配意式薯鯷魚脆 八爪魚的鮮嫩與意式薯仔麵糰的酥脆形成鮮明對比。鯷魚脆與辣肉腸甜椒汁的運用，恰到好處，讓味道層次更加豐富。 最後，香檸檬芝士蛋糕的清新口感令人耳目一新，酸柑與楓糖漿的香甜交相輝映，糖漬檸檬皮及碧根果曲奇則為整個餐後驚喜收官，讓人心滿意足。 如果想二人好好享受精緻的晚餐，或作周年紀念慶祝，這裏是一個好選擇。

Tung Sum 4 個月前

去咗尖沙咀 Harlan's 食飯，個維港海景真係無得輸，好有 feel！ 前菜「魚子醬配海螯蝦他他」賣相好精緻，鮮甜嘅蝦肉他他配埋鹹香嘅魚子醬，層次好豐富；另一道「法式凍蕃茄清湯配煙燻龍蝦及蟶子」就夠晒清爽，蕃茄湯酸酸甜甜，龍蝦同蟶子肉又爽口，好開胃。 主菜「A5和牛臀腰肉」煎得啱啱好，肉質粉嫩、油香十足，加埋舊肥美香濃嘅鵝肝同芥末葉提味，真係入口即化！朋友食嗰道「慢煮伊比利亞毛豬」都好嫩滑，啖啖肉汁，配埋焦糖甜瓜沙律一齊食，啱啱好解晒油膩感。 最後食埋個「白桃紫蘇葉法式慕絲」甜品，清甜之中帶點微酸同草本香氣，非常順喉。成晚望住個無敵大落地玻璃窗睇日落同夜景，食物質素又高，慶祝或者約會嚟呢度真係一流！

DI DI 5 個月前

成排落地玻璃望住成個維港，夜晚燈光柔和，有浪漫感但又唔會太拘謹，好適合慶祝或者慢慢歎。 嗌咗個三道菜套餐, 2個人點嘅菜式都唔一樣! 前菜 暖黑松露布里芝士撻配酸甜汁無花果沙律 一切開，黑松露味即刻出晒嚟。入面嘅布里芝士滑得嚟又有咬口，個撻底好脆。無花果沙律酸酸甜甜，啱啱好中和芝士嘅油膩，食完唔會覺得滯。入口仲有芝士香同黑松露香。 香茅煙燻水晶藍蝦配手指檸檬同魚子醬 上枱已經好靚。藍蝦係刺身級，新鮮、爽口、甜身，加埋魚子醬嘅鹹鮮同手指檸檬微微酸，成個味道幾有層次。 主菜 珠雞胸配龍蝦湯海南雞飯 估唔到雞胸可以咁嫩。用慢煮整，一啲都唔嚡。最驚喜係個龍蝦湯，好濃，啲飯吸晒湯汁，成個傳統海南雞飯即刻升級咗好多。 慢煮小羊架配北海道白粟米 羊肉好軟，冇羶味，肉汁保持得好。粟米本身好甜，做配菜啱啱好平衡返個主菜。 甜品 火麻籽焦糖煉奶意式奶凍 滑滑地，火麻籽味唔會太重，加埋焦糖煉奶之後味道更完整，食完唔會過甜，幾清爽。

Free 5 個月前

今次去試咗佢哋的Dinner Tasting Menu，整體感覺精緻又有驚喜，環境舒服；服務員態度一流，我行開咗影相幾分鐘，返來已經見到摺靚靚嘅餐巾。 等緊正餐嘅同時，職員同我哋講有任食海鮮作前菜，呢個前菜真係夠晒份量！ Starter 三選一，我哋share咗兩個： • 香茅煙燻水晶藍蝦配手指檸檬及魚子醬，蝦肉鮮甜，煙燻味輕輕地，上面魚子同汁好多，賣相好精緻。 • Warm Black Truffle & Brie Cheese Tart 配無花果沙律，黑松露同布里芝士搭配得好好，下面酸甜的無花果沙律中和咗濃郁的芝士，撈勻嚟食特別香。 Main 部分都幾正： • 珠雞胸配龍蝦湯海南雞飯，用法國珍珠雞，雞味濃，肥而不膩；下面飯用龍蝦湯浸過，好有心思。 • 另外一個Braised Ossobuco（燴牛膝）配血橙同鵝肝薯蓉，牛膝燉得軟腍，血橙味帶出清新感，幾特別。 Dessert 係 Hempseed & Caramel Condensed Milk Panna Cotta，呈現成芋頭形，很有儀式感。上面有夏威夷果脆脆，下面有普洱茶啫喱。職員建議配焦糖煉奶茶一齊食，因為奶涷甜度唔高，加咗煉奶之後平衡得好好，食落去順滑又香。 整體嚟講，菜式做得精緻有心思，味道平衡。環境有設計感，晚上景色應該更靚。尖沙咀想食有質素的Tasting Menu，又唔想太貴，這裡係不錯的選擇。🍽️

Muji Tsoi 6 個月前

維港景色作伴嘅精緻晚宴 星期日同朋友六點半嚟到The ONE 19樓嘅Harlan's，為嘅就係佢個無敵大海景。餐廳樓底夠高，配埋全透明玻璃，環境開揚舒適，我哋專登早少少到，目的就係為咗欣賞由日落轉換到夜景嘅維港景色，果然冇令人失望。 我哋揀咗佢哋做緊嘅Dinner tasting menu，三道菜每位$888。值得一讚嘅係，點三道菜已經包咗個海鮮吧，有齊凍蝦、麵包蟹、螺同青口，作為前奏相當豐富。 講返食物，擺盤好有心思，賣相精緻。前菜嘅「香茅煙燻水晶藍蝦配手指檸檬及魚子醬」，煙燻香氣突出，配搭新穎。另一款「暖黑松露布里芝士撻配甜酸汁無花果沙律」，芝香濃郁，同清新嘅無花果沙律幾平衡。 主菜嘅「珠雞胸配龍蝦湯,海南雞飯」，將西式材料配搭亞洲風味，做法有諗頭。而「燴牛膝配血橙鵝肝薯蓉」嘅配搭亦見特色，鵝肝薯蓉口感細滑。 甜品「火麻籽焦糖煉奶意式奶凍配法式甜麵包及夏威夷果仁脆」就為呢餐作結。 特別想提嘅係餐廳嘅服務，侍應服務非常細心，態度好好，而且每上一道菜都會詳細介紹菜式嘅特色同構思，而且成晚上菜節奏明快，唔需要呆等，整體用餐體驗令人愉快。