La Parrilla Steakhouse (Tsim Sha Tsui)

Chung Pyro 2 天前

今次同朋友嚟到尖沙咀山林道嘅 LA PARRILLA STEAKHOUSE 食 Lunch，成間餐廳充滿異國風情，估唔到午餐 $168 就食到高質阿根廷草飼牛同海鮮，CP 值超高！最狂嘅係主菜配上無限量供應嘅炸薯條，送上枱熱辣辣脆卜卜，薯香十足，食完仲可以免費續加，薯條控真係食得超開心！ 頭盤揀咗佛卡夏麵包開胃，主菜方面我哋叫咗西冷牛扒同埋酥脆金黃鱈魚！西冷牛扒 (Bife de Chorizo) 選用精選優質阿根廷草飼牛，煎到剛剛好，肉質紮實有咬口，咬落肉汁爆發，牛味極之濃郁！配埋阿根廷青醬 (Chimichurri) 同芥末醬，青醬嘅酸香微辣完美帶出牛肉鮮味，層次感爆燈！另一道酥脆金黃鱈魚 (Batter Wild Cod fish) 同樣驚艷，外層炸到金黃香酥，咬落去咔嚓一聲，裡面的鱈魚肉質滑嫩多汁又鮮甜，完全冇油膩感！ 配埋無限添加嘅熱辣辣金黃薯條，一邊食肉一邊歎薯條，成餐飯真係超滿足！想喺尖沙咀搵間 Chill 住歎阿根廷風味西餐廳，呢間絕對值得試！🎉🎉

EggTartBoy 3 天前

【尖沙咀超高性價比扒房 🥩 La Parrilla 鐵板牛扒誠意推介！】 今日晏晝去咗尖沙咀山林道嘅「La Parrilla Steakhouse」食lunch，餐廳環境幾有傳統扒房嘅格調（黑白格仔地磚好有feel）。今次叫咗兩個Set Lunch，埋單$370（連加一），以尖沙咀嚟講真係抵到爛！ 🥩 Set Lunch ($168/位) 呢個價錢有牛扒食真係好驚喜！牛扒用熱辣辣嘅鐵板上枱，一放低就不停冒煙，「吱吱聲」嘅視覺同聽覺享受滿分！叫咗Medium Rare，切開入面呈現完美嘅粉嫩色澤，肉汁豐富，肉質軟腍得嚟帶有咬口，牛味濃郁。鐵板嘅熱力令牛扒邊位帶微微焦香，面頭加上香草牛油同寫住「MARE」嘅木籤，儀式感十足！😋 🍟 配菜：炸薯條 跟餐嘅薯條份量十足，炸到金黃香脆，熱辣辣，點茄汁食係永恆嘅經典配搭。 🥗 配菜：田園沙律 沙律菜非常新鮮，除咗基本嘅雜菜，仲有牛油果、青瓜、車厘茄同紅洋蔥，淋上微酸嘅沙律汁，清新解膩，剛好中和返牛扒嘅油膩感。 🌿 特調醬汁 餐廳附上咗兩款醬汁，一款係茄汁，另一款係帶微辣嘅香草青醬（Chimichurri），用嚟點牛扒或者薯條都好惹味，增添咗唔少風味。 💡 Overall 單據上寫住由Manager負責serve，店員服務態度好好，落單同上菜都快。埋單370，人均$185就食到高質鐵板牛扒套餐，真心係「糧尾恩物」！無論係同朋友gathering定係自己嚟鋸扒，都非常推薦！一定會Encore！👍🏻✨

CH Wong 1 個月前

由前菜的手工餃、沙律, 再到主菜的一個月熟成阿根廷草飼牛扒及烤雞, 以至甜品的焦糖布甸, 都一樣令人回味。

Charlie Chan 1 個月前

服務非常好。星期日都係set menu，下午3-5點仲有tea menu。阿根廷草飼牛rump同sirloin都好好食，好juicy，肉味rump更濃。Unlimited 薯條都不斷新鮮炸起。非常推介。

Calvin Ho 1 個月前

今日中午約左朋友係尖沙咀食lunch， 行行下經過見到呢間餐廳門口裝修都幾特別，所以吸引左我地入去食，原來係一間阿根廷餐廳。餐廳座位之間非常闊落，加上柔和既燈光，感覺非常chill。我同朋友前菜點左沙律，有1個主菜加左錢點左個肉眼扒，另1個點左酥脆金黃鱈魚。首先上左個沙律菜，碟沙律菜賣相整齊，沙律菜同車厘茄紅綠相間，望落新鮮爽脆，咬落確實夠脆口，水份充足，車厘茄甜得黎帶微酸，非常開胃。 之後上左個肉眼扒，脂肪分佈均勻，邊位帶適量油花，煎製技巧到位，外層帶點焦脆但唔會燶，內裡保持五成熟嘅玫瑰紅色，肉汁鎖得極佳，切開時無過多血水滲出，熟度控制精準。入口散發天然嘅牛脂香，肉質軟嫩但保留適度嚼勁，整體平衡度不俗。配菜薯條任食，外脆內軟。 跟住上埋個鱈魚，肉質雪白，紋理清晰。炸既時間掌握恰當，魚皮金黃帶脆，魚肉剛好離骨，細嫩嘅肉質，滑溜得嚟保持適度彈性，唔會過腍或鬆散，加埋檸檬汁配搭恰到好處，無掩蓋魚本身既鮮味亦食唔出有魚腥味。最後叫左個啤酒飲，試業期間係免費的。整體黎講令我非常滿意既一餐。