唐悅海鮮酒家

林崇禮 1 天前

今日放工後約咗老婆去旺角東食晚飯，行過見到呢間「唐悅海鮮酒家」，見佢門面光鮮，入面裝修好傳統，係嗰種坐得好舒服嘅老牌酒樓格局，一於入去試下。點知食完成餐，發覺呢度啲小菜同燉湯真係好有驚喜，性價比極高！ 首先一定要講講佢個杏汁燉白肺湯。呢個真係要俾滿分！一上枱已經聞到好香嘅杏汁味，飲落好濃郁、好滋補。最正係佢真材實料，入面有齊豬肺、瘦肉、雞腳同雞件，燉到超級入味又軟腍。本身唔係好鍾意杏仁味嘅老婆，竟然都飲到停唔到口，仲話想encore！個湯嘅份量仲要好大盅，兩個人飲絕對夠晒。 跟住上枱嘅係燒乳鴿。乳鴿燒到皮脆肉嫩，一咬落去啲肉汁爆晒出嚟，好Juicy。個皮帶有微微焦香，油香十足，兩個人一人一半，作為前菜真係一流。 主菜我哋嗌咗個茄子燒石斑。平時食石斑多數係清蒸，呢度用茄子去燒，估唔到又幾夾㖞！條石斑好大條，魚肉鮮嫩滑溜，完全冇腥味。啲茄子索晒啲惹味醬汁，好食得嚟又唔覺油膩，真係忍唔住一啖接一啖。 另外仲加咗個靚馬友鹹魚蒸肉餅。呢個絕對係「白飯殺手」！肉餅全部用新鮮豬肉手打，食落爽口彈牙。面頭鋪咗鹹香嘅馬友鹹魚，味道唔會死鹹，反而帶出好濃郁嘅鮮味。我同老婆每人撈咗一大碗絲苗白飯，好快就清晒碟！ 埋單計數，兩個人食到咁飽，仲要有優惠，人均都係二百零蚊左右。喺旺角咁多餐廳選擇嘅地段，呢間真係做得好出色，食物質素高之餘，份量仲要好足。特別係佢個燉湯，真係會令人想返轉頭再飲過。下次一定會再帶屋企人嚟encore！

Milk Lam 2 天前

經過旺角想食下中菜！ 見到啲海鮮幾生猛！入去試下！覺得幾特別尤其係杏汁燉白肺湯 。原來係招牌，怪不得好飲，第一次飲 其他餸都唔錯 。

Li Kin 5 天前

今日嚟咗間位於旺角嘅海鮮酒家食晚飯、餐廳入邊唔算大、位置都唔算多，如果想食嘅朋友仔最好book位。一入門口就見到各類游水嘅海鮮，有時仲見到廚師即刻拎入去烹調。一坐低就會俾碟酸蘿蔔同埋花生俾你食、可以飲添的，餸菜款式種類都多，各類中菜小炒都有、我哋叫咗幾碟啱食嘅試吓。老細都間唔時走過嚟問我哋啲菜啱唔啱食，幾親切嘅感覺。 沙巴躉班 廚師同我哋講係新鮮即劏的、條味係比較經典嘅豉油，薑蔥等等配料。肉質係相當之嫩滑同結實、係新鮮先食得出嘅嗰種口感。 當紅脆皮新鮮雞 上菜嗰陣都有同我哋講係新鮮雞、 擺盤仲有條介咗花嘅雞胸。個皮係相當之脆，肉質亦都係偏緊實唔係鞋口、配咗碟鹽可以點吓。 通菜啫啫煲 一上嚟就係渣渣聲、入邊有蝦米、蝦醬辣椒、肉碎等等嘅經典調味。 韓式泡菜肥牛煲 個煲一上嚟就中間有隻生蛋、店員話攪勻佢令到牛肉可以更加嫩滑，煲底下有外層煎過嘅嫩豆腐。調味係帶有少少辣韓式泡菜味。 杏汁燉白肺湯 呢個湯我覺得好好飲、入口就有種好Creamy嘅感覺、調味啱啱好唔會過淡過濃，材料亦都有豬肉雞腳白肺等等、其中既肺真係入口即溶咁咪既口感。

Martin Yau 1 週前

今晚去咗旺角洗衣街一間唐悅海鮮酒家食飯,這裏地方雖不算大,但這間菜館裝修簡潔而雅緻,小店經營,食材新鮮,真材實料有質素, 叫了個二人套餐,抵食有驚喜,值得推介。 杏汁白肺湯,濃濃老火湯味道,足料,香甜美味。 聖子皇大大只,爽甜彈牙,夠獲氣 黑松露蝦多士,香脆彈牙有口感,配黑松露醬,錦上添花,美味。 無錫豬軟骨煲,香、軟、淋,好食 金銀蛋肉碎莧茶,廚師廚藝一流,把咸蛋、皮蛋溶為一體,金銀蛋味濃郁,一絕 整個二人套餐絕不欺場,交足功夫,服務招呼週到,是現在難得有水準的飯店,值得推介,會再來。

Sammi Law 2 週前

近排行過旺角發現有間幾舒服嘅中菜館，食完覺得比想像中有驚喜。 今餐最有記憶點係兩樣：燒乳鴿同杏汁燉白肺湯。 乳鴿上枱時仲熱辣辣，皮薄而脆，肉質保持到嫩，唔會乾柴。今次二人用餐有推廣送乳鴿，本身對「贈送菜式」冇太大期望，但呢隻反而做得幾好。 杏汁燉白肺湯就係另一個亮點。湯底有濃度，但唔會重口或者油膩，杏汁香氣自然，材料亦唔少。飲到最後都唔覺滯，呢款我會想再點。 另外食咗 豉椒炒聖子皇 同 無錫豬軟骨。聖子皇夠鮮，配豉椒幾惹味；豬軟骨炆得夠腍，醬汁亦幾入味，整體味道都算穩定。 餐廳環境比傳統酒樓新淨，枱與枱之間唔算迫，亦有較大張圓枱，家庭飯局幾合適。服務方面都幾好，店員主動，成個用餐過程舒服。 今次人均約$250 如果第一次去，我會優先叫： 燒乳鴿 杏汁燉白肺湯