高高酒家

Mok Gavin 4 個月前

同區利星小炒食得太多，近日轉去多人談論的高高酒家一試，呢間小炒同樣有鑊氣，亦有其他酒家少見的菜式，侍應服務態度亦友善，唔會係個種不可一世的惡少心態。消費大約人均二百左右，屬合理價格。 1）避風塘椒鹽瀨尿蝦：必試菜色，剝好再沾薄粉快炒，外脆之餘保留肉質濕潤，滿滿避風塘炸粉送酒一流，懶人必試。 2）冰鎮咕嚕肉：炒好用真冰粒雪住上菜，甜甜酸酸，外冰內熱，夏天消暑佳品，下底有水隔將水同肉分隔，唔會有一泡水浸肉的情況出現。 3）煎焗魚腸：魚腸加大量茜菜，薑絲連旦煎成一底似蠔仔旦，食落無腥味，比一般砵仔焗魚腸香口。 4）啫啫芥蘭菜：蝦醬加豬頸肉炒起放煲內翻熱，芥蘭脆口，豬頸肉切成幼條狀增加口感，但略嫌太重味，一定要伴飯 5）炸豬手：乾身好食合格，屬酒家中上質素菜式，但唔算驚喜。 6）薯仔牛柳粒：同豬手一樣，合格有餘屬中上級數，但不驚喜菜色，黑椒味略嫌太淡。 7）咸蛋旦焗生蠔：用咸蛋黃漿撈勻薄粉炸起桶蠔再炒，每啖都是咸蛋黃香味，配一口咬入蠔肉軟糯鮮香，兩者配搭剛剛好。 8）咸香雞：正常無特別，啖啖肉。

Peony Ho 4 個月前

🦐 避風塘瀨尿蝦肉 唔使剝殼，啖啖肉，辣辣哋勁香口！ 惹味得嚟又方便，啱晒我呢啲懶人 🍲 濃湯雞煲翅 大大嚿翅＋花膠， 飲到漿口，正到冇朋友 真材實料，飲完個嘴唇有黏黏地嘅感覺 ❄️ 冰鎮脆皮咕嚕肉 外層脆到索索聲，冰鎮完仲爽，酸甜開胃 熱焫焫炸起再即刻冰鎮，外凍內熱幾過癮 🐔 招牌新鮮鹹香雞 新鮮雞果然唔同，肉嫩鹹香啱啱好 雞皮爽滑唔油膩，連平時唔食皮嘅我都食埋 🦪 大廚蠔餅 蠔仔脹卜卜，個餅大塊到嚇親人 邊位脆，中間保留到蛋漿嘅嫩滑，蠔仔新鮮 🌱 高高小炒王 最過癮係加咗爽脆芋頭絲同大大隻蝦米， 脆芋絲咬落嗦嗦聲，送酒好啱 第二度食唔到！

MIC JACKIE YICK 5 個月前

最大問題係餐具潔淨度，全部碗筷都係比漂白水揦到溶晒，洗四隻碗係仲有飯黐住兩隻碗……. 睇完Creamy YouTube條片就訂位去食飯，去到必叫避風塘瀨尿蝦、冰鎮咕嚕肉，整體可能因為YouTube食評影響，全場爆滿，味道冇甚驚喜，而且仲甩單 避風塘瀨尿蝦：冇Creamy講到咁好食 冰鎮咕嚕肉：係好食嘅唔係生炒骨冇骨頭純肉，但係冇菠蘿只有少量青椒黃椒 泡椒浸魚卜：呢個好食 小炒王：全場最差，全碟都係炸芋頭絲，少量韭菜花，無魷魚，腰果係腍嘅，極微量蝦乾同魚乾仔 椒鹽鮮魷：好一般，無乜椒鹽味，只有炸粉 懷舊煎魚腸：放咗飛機甩咗單

Leo Cheung 8 個月前

避風塘瀨尿蝦、冰鎮咕嚕肉，必點！其他嘢都好好食，價錢實惠，10個男人食飯再叫埋N支啤酒，每人埋單<$300，仲要有質素，依家香港好難得。 泊車可以周街泊但自行承擔風險，附近政府合署泊車都好抵，夜晚7點後入閘，$50泊一晚。

tintin morita 1 年前

高高酒家 (深水埗）
深水埗福榮街188號曉盈地舖及1樓 #高高酒家#叫餸食飯#深水埗#hk Happy Friday，一行6人去食飯，友人推介去食大排檔，Book定位唔洗等。 餐廳面積頗大，都幾多人幫襯。 冰川無骨咕嚕肉，賣相不俗，口感外脆內軟，味道酸酸甜甜，清爽之感，好啱夏天食。 椒鹽鮮魷，份量十足，唔係蘸好多生粉果下正，口感外酥脆，鮮魷爽口彈牙好惹味。 椒鹽九肚魚，口感外鬆脆內嫩，魚肉軟滑有鮮味，美味。 椒鹽瀨尿蝦，呢個先係大佬，本身好鍾意食瀨尿蝦但好懶剝殼，而呢碟係晒剝嘅原隻瀨尿蝦， 同樣粉漿唔多，蝦肉鮮香肉質飽滿又惹味，食得方便好滿足。 高高小炒三，有韭菜花、芋絲及腰果等好多料，香氣十足，口感爽脆香口。 大廚蠔餅，本身好鍾意食蠔餅必叫，份量十足好大件，口感十分香脆，蠔仔份量十足夠鮮味，鹹香惹味。 豉油王炒麵，份量十足，炒麵入味爽彈又香口。 椒絲腐乳通菜，通菜口感爽脆，鹹香惹味，不俗。 食物味道不俗，適合大夥人。