Lounge Hakuba

wingwing wn 2 個月前

餐廳位於旺中帶靜既商場，同朋友傾計都方便啲！夜晚有 Dinner Set，包2個Starter，Main and Dessert（兩個人埋單連加一 $675，人均 $330 左右，喺銅鑼灣算係性價比幾高嘅選擇）： ⭐️Soup of the day(Borscht) 好濃的蕃茄及黑椒味，開胃 -⭐️柚子胡椒唐揚炸雞 以前菜定義份量的炸雞來就太足料，炸物太脆了。食落酥脆，一咬落去仲有肉汁。配埋柚子胡椒，清新嘅柚子香，啱啱好中和咗炸物嘅油膩感，好惹味！ ⭐️日式菇醬炸豆腐 初嚐醬汁似味僧湯，淋上豆腐外面口感好豐富；而且豆腐好滑，外面既炸粉都好薄身，好有和風家常菜嘅治癒感。 ⭐️紫蘇比目魚 原來沒跟配菜（以為有薯蓉），但比目魚肉質好嫩滑，魚油香氣好足。加埋紫蘇葉獨特嘅香氣及口感，幾夾！ ⭐️阿根廷紅蝦海鮮飯 呢個好驚喜！隻阿根廷紅蝦好大隻，肉質彈牙，蝦味濃郁。另外仲有左口魚，入口即溶，還有其他海鮮如蜆肉，魷魚；海鮮飯底吸收晒蝦汁同海鮮嘅精華，每口飯都好鮮甜，加埋飯焦，食到停唔到口。 最後用Tiramisu 來做結尾！

Eunwoo BB 3 個月前

今日放假去咗試一間幾有特色嘅日式餐廳，食咗一餐令人滿意嘅料理。😋 主菜點咗「Y.O.B. 自選便當（週末限定）」，鰹魚湯烏冬湯底清甜；豆腐配雜菌味道清淡鮮美。🥢 明太子玉子燒口感嫩滑，上面仲放咗幾粒鮮艷嘅三文魚籽；而土手燒同日式燉豬肉都燜得非常入味，肉質軟躪，調味啱啱好 朋友選咗蟹味噌意粉，賣相非常精緻，意粉鋪滿絲絲蟹肉跟辣椒絲，仲用咗一朵食用花點綴，蟹膏香氣濃郁，每口都好鮮美。🦀 飲品方面，宇治抹茶鮮奶同靜岡焙茶鮮奶上面，分別有精緻嘅chiikawa拉花，望到令人心情愉快，茶味亦香濃順滑、甜度適中🍵🐶 最後嘅阿華田窩夫（Croffle）配搭相當豐富，係今餐嘅MVP，除咗外脆內軟嘅窩夫，碟上仲配有一大球雲呢拿雪糕、軟糯嘅麻糬、威化餅同Lotus餅乾碎，淋上濃郁嘅阿華田醬一齊食，冰涼軟糯又帶點香脆，口感層次好豐富🧇🍦✨

So soullovefood 3 個月前

「銅鑼灣高CP值日式午餐 — Lounge Hakuba 自選便當必試！」 Lounge Hakuba 位於銅鑼灣 Tower 535，主打「B.Y.O.B Build Your Own Bento」自選便當，平日午市套餐只需約 $247，已包括主食、飲品及甜品，性價比極高。木魚湯烏冬湯底清香，配上椒鹽玉子豆腐及明太子日式蛋卷，口感層次豐富；味噌比目魚鮮嫩入味，牛阪健肉質柔軟，整體搭配均衡。甜品提拉米蘇細膩香滑，奇異果茉莉冰茶清爽解膩，令人回味。 另一款壽喜燒牛脊肉炒烏冬套餐 ($244)，牛肉香甜，烏冬吸收濃郁壽喜燒醬汁，口感彈牙；山葵餃子帶微辣刺激，蟹肉忌廉可樂餅外脆內滑，令人驚喜。最後以熱靜岡焙茶配提拉米蘇作結，完美收尾。必點的 Bento Box 套餐，集主食、飲品及甜品於一身，既多元又高質。餐廳環境舒適，適合午間聚會或輕鬆用餐。 📍地址：銅鑼灣謝斐道535號 Tower 535 3樓302號舖#LoungeHakuba #銅鑼灣美食 #日式便當 #高CP值餐廳

林崇禮 4 個月前

銅鑼灣樓上寵物友善餐廳，氣氛好食物高質，Tasting Menu份量大到嘩嘩聲 今日同老婆去銅鑼灣行街，夜晚想搵間靜靜哋嘅餐廳 chill 下，就嚟到謝斐道呢間樓上 lounge。一入去就覺得環境氣氛幾好，柔和嘅英文歌做背景，最驚喜係呢度可以帶大狗入嚟，見到幾個狗主帶住狗狗一齊聚會飲嘢，成個場好輕鬆好 warm。 我哋兩個嗌咗佢哋嘅 Tasting Menu（$320/位），再加咗 $68 要埋個慢煮黃油雞（二人份），另外散叫咗兩杯 signature cocktail。 首先上枱嘅係 X.O.醬蝦油枝豆。個配搭幾特別，邊飲嘢邊食都幾過癮，鹹鹹香香好送酒。 跟住係 沖繩紫薯青蘋果沙律。呢個好有驚喜，紫薯香甜，青蘋果爽脆清新，食落好開胃，我同老婆不經不覺就清晒。 第三道小食 碎蔥吞拿魚他他，可以配紫菜包住食。吞拿魚他他調味帶少少辣，幾有層次，包住紫菜一啖過，口感好好。 之後係 酒煮醉蜆。呢個我老婆最鍾意，佢話啲蜆好新鮮，酒味恰到好處，連個湯底都想飲埋。我試咗一啖，真係幾鮮甜。 再嚟係 煙燻蘋果木牛粒。牛粒煙燻味好出，有咬口得嚟肉味濃郁，仲有脆蒜片伴碟，送酒一流。 主菜有兩款。第一個係 日式海鮮燴飯，入面有左口魚裙邊、帶子、虎蝦同蜆。魚油味好重，啲飯吸晒海鮮精華，超香，仲有飯焦添！我忍唔住食完一啖又一啖。第二個主菜係我哋 加 $68 嘅慢煮黃油雞，雞肉好嫩滑，調味唔會太搶，但老實講，食到呢度我哋已經好飽，最後都食唔晒，個餐份量真係好大。 我哋仲另外嗌咗兩杯雞尾酒。我嗰杯 Morning Dew（$138），有紫蘇嘅味道好清爽。佢嗰杯係Komorebi（$128），佢話有蜂蜜味，飲落似食緊糖咁甜，但兩杯酒精都偏濃，如果唔係好飲得酒嘅人，可能要 share 一杯。 總括嚟講，呢間 lounge 氣氛好，食物質素高，cocktail 有誠意，最緊要係可以帶狗仔一齊 chill。Tasting Menu 份量真係大到嚇親人，每道菜上枱我同老婆都不停「嘩嘩聲」。下次帶埋朋友同佢哋嘅狗仔嚟 encore！

kiki lala 5 個月前

朋友介紹，今日帶我去食一間係銅鑼灣，超好氣氛又好食既居酒屋，Lounge Hakuba。 心諗唔知有幾好食，點知黎到，觀感已經非常之好，地方好安靜，真係鬧市中既綠洲。 見到個Tasting menu 好抵，就唔洗諗簡左。 佢本身前菜都好多野食： XO醬蝦油枝豆好香濃野味，連枝豆咁寡淡既食材都可以咁好味。 沖繩紫薯青萍果沙律真係好香紫薯味，仲有佢自帶既青萍果香甜，令人一試難忘，直情可以做甜品。 碎蔥吞拿魚蓉他他，酒煮醉蜆都好夠新鮮，無敵。 煙燻蘋果木牛粒真係好吸睛，玻璃盒裝住係入面煙熏住，打開勁香又好睇，而牛粒都好香稔。 慢煮黃油雞好足本，比想像中大份，肉質嫩滑又keep到黃油香，2人用真係會食唔晒。 仲有日式海鮮燴飯好多海鮮，新鮮得黎好入味，唔會腥，飯又煮得好，剛剛好有啲飯焦，夾埋佢個秘製醬汁真係食到停唔到。 而最驚豔係2杯雞尾酒：Maple Hunter同Wachini，好易入口之餘裝飾一流，視覺效果爆燈。 真係十分滿意既一餐。