盛記粥麵 (旺角店)

鍾怡怡 2 個月前

位於旺角❣︎盛記粥麵❣︎主打食港式粉麵同粥品，裝修充滿懷舊特色，每樣食物都係港式老味道🤟🏻🤟🏻🤟🏻鍾意加配埋其他食物，記得揀優選套餐😋我樣樣都想加🤭超多選擇唷‼️

Sum Li 3 個月前

見好多人評論這間雲吞麵好好食, 咁啱路過就入去試下, 都好多客幫襯, 淨係叫咗碗雲吞麵食, 感覺真係好一般非常失望, 雲吞細粒又鬆散, 麵質一般, 個湯底叫做ok, 我覺得整體上質素比一粥麵好些少, 畀啲人吹到天上有地下無, 真心冇下次（純屬個人意見）

Ellie T 3 個月前

第一次食盛記，原來好好味！ 鍾意個大地魚湯！麵都好彈牙 水餃雲吞餡料飽滿😋 佢個炸雞翼好出色 入味又脆 同埋個桑寄生蛋茶隻蛋好滑 真係又平又好味 諗住等冇咁熱時 再去試佢個豬潤粥

Rita 3 個月前

呢間喺旺角花園街嘅盛記粥麵，真係一間好地道嘅街坊食堂。今次同朋友去食，試左幾樣野都幾好！ 特別想讚佢個及第粥，粥底綿滑，內臟處理得幾乾淨，完全冇異味。另外加配嘅炸兩仲帶點脆口，點埋豉油同甜醬麻醬食一流。雲吞麵嘅麵質夠爽彈，雲吞鮮甜好食。仲有嗰4隻炸雞翼，炸得熱辣辣，外皮香脆，肉質保持到肉汁。嘢飲方面，凍檸茶，茶底幾好，凍豆漿消暑一流。 兩個人食到飽一飽，每款食物質素都好平均，下次行街行到攰可以再嚟幫襯！👍

peggy Apple 7 個月前

盛記粥麵．旺角街坊既老港味道 講起港式粥麵，而家好多新派舖頭都做唔返舊時個種風味。 行開旺角，醒起花園街有間「盛記粥麵」聽講幾企理， 就入去幫襯下，順便懷念下細個既味道。 一試之下，果然無令人失望，係用心做既街坊好店！ 首先講飲品，我同朋友叫咗凍豆漿同桑寄生蛋茶。 凍豆漿好有豆味，唔會太甜，飲落透心涼，唔錯。 桑寄生蛋茶仲正，好香藥材味得嚟又清甜， 隻蛋仲要入晒味，食完感覺成個人舒服晒。 食物先黎個蔥花蝦米炸兩腸粉，呢個真係必食！ 腸粉皮滑捋捋，包住既油炸鬼仲係「白脆即炸」， 上枱時仲熱辣辣脆卜卜，加埋甜醬麻醬， 口感勁豐富，唔似出面好多地方淋晒咁，掂！ 跟住到招牌雲吞拼鳳城水餃麵。一啖入口， 嘩，勁有香港舊時既味道！ 麵底爽口彈牙，無鹼水味，好耐無食過咁靚既麵。 雲吞大大粒，入面好多蝦， 咬開仲有陣大地魚既香氣，傳統味道出晒嚟。 水餃都唔輸蝕，餡料豐富，木耳蝦肉爽口， 香氣十足，呢碗麵真係食到回憶返晒嚟！ 食粥梗係要試豬潤粥。豬潤厚切， 煮得剛剛好，入口爽滑仲好香豬潤味； 粥底夠綿，米香同豬潤既味道融為一體， 係我鍾意既廣東粥底。 最後仲叫多碗炸醬麵，又係勁傳統。 醬汁酸甜辣平衡得好好，肉絲有咬口， 撈勻個麵一齊食，簡直停唔到口，呢碗絕對係我心水！ 成餐食落，由飲品到麵食，每一樣都食得出心機同誠意。盛記粥麵完全做到香港舊時既風味，價錢又實惠。 餐廳：盛記粥麵 地址：旺角花園街3-5號鴻威大廈地下11號舖 #盛記粥麵 #香港味 #Wonton #Noodle #雲吞