Yohaku-余白

Marco Chan 2 個月前

今次好好彩受到余白嘅邀請，試食咗佢哋嘅晚市御膳三重奏，呢個餐嘅份量真係超級足，又有前菜，又有主食，仲有甜品，食完超級飽，重點係超好味，全部食材都好有質素。 前菜 1.番茄煙三文魚冰菜沙律，清爽開胃，冰菜新鮮爽脆。 2.柚子醋凍陪甜蝦蟹肉菠菜，甜蝦新鮮大隻十分軟糯，蟹肉同菠菜都新鮮爽口，夾埋醋凍一齊食超級開胃。 3.蟹肉茶碗蒸，蒸蛋十分嫩滑，用料都十足，有菇同蟹柳。 （其實之前都嚟食過，佢哋前菜嘅搭配都有唔同，好有心機，唔會食悶。） 黑毛和牛配牛舌御膳($258) 然後就係個主食，我哋今次就試佢哋嘅黑毛和牛配牛舌御膳，呢個主食雖然全部都係牛，但佢好多款唔同嘅配料，例如檸檬，山藥泥，鹽昆布，生蛋，鹽蔥脆脆，所以有好多唔同食法，可以跟住自己口味去揀。而啲牛舌嗰熟度啱啱好，好嫩，和牛入口即化。而我最欣賞就係高湯同山藥泥呢個配料，因為食到最後開始有啲滯，加埋佢哋配飯同牛完全中和咗啲牛嘅油膩。 和牛左口魚邊釜飯($288) 跟住我哋仲試咗和牛左口魚邊釜飯，呢個飯啲配料真係正中我心，又海膽又三文魚籽，全部都好鮮甜，左口魚都燒得好香，和牛都係入口即融。而個餐都會附有配料包括柚子醬油，Wasabi，紫菜碎，蔥花，鹽蔥脆脆，辣蘿蔔蓉，所以可以製作唔同嘅食法，唔會因為和牛同左口魚嘅油膩而覺得食滯。啲餸嘅份量都超足，食到好飽好抵食！ 甜品 1.豆腐雪糕真係超推介，唔會好甜，好香滑重豆味，仲配咗啲餅乾碎碎，有啲口感，每次食完都好掛住。 2. 焙茶奶凍，炭焙茶香重偏creamy嘅奶凍，口感嫩滑，上面帶有玫瑰花碎，增加左啲花香嘅甜味。 最後就係餐廳環境都好好，坐得好舒服，店員上餸嘅時候都會好用心去介紹每款嘢食嘅食法。總之就係無論從環境，店員嘅服務，食材嘅配搭，都可以感受到余白係一間好用心嘅餐廳！

Alice Ko 3 個月前

😋御膳三重奏 多謝餐廳邀請，今次點左佢哋嘅御膳三重奏，有先付三品、主食同甜品，價錢由 $228 至 $298 不等 🥢先付三品
三品都幾精緻： * 🥗冰菜蕃茄沙律清爽開胃，冰菜脆口，蕃茄甜酸平衡 * 🥚茶碗蒸蒸得非常嫩滑，裡面有菇菌、蟹柳等多款配料，味道層次豐富。 * 🍤甜蝦蟹肉醋凍，甜蝦鮮甜軟糯，蟹肉鮮味十足，配上酸酸的醋凍，味道豐富又醒胃 主食
店方有六款主食選擇，我同朋友分別揀咗兩款： 🐮黑毛和牛配牛舌御膳（$258）
份量比想像中多，和牛油脂豐富，肉質柔嫩多汁；牛舌粉嫩彈牙，汁水豐富。附有山芋蓉、蔥鹽、紫菜味素同高湯，最少有三種食法，可以自己調配，玩味十足。 🍲關東風極上三味壽喜燒鍋（$298）
有日本牛肉、澳洲牛肉同北海道豚肉。三種肉各有特色：日本牛肉配生蛋黃特別滑溜，但肉味相對清淡；澳洲牛肉肉味濃郁；北海道豚肉則鮮嫩多汁。鍋內配料非常豐富，有大蔥、芋絲、南瓜、秀珍菇、大白菜、茼蒿同紫蘿蔔。整體味道比外面一般壽喜燒淡身，剛好不會搶走肉的原味。 每款主食都附有醃蘿蔔同蜆肉味噌湯。醃蘿蔔偏甜，蜆肉味噌湯飲得到蜆嘅鮮甜，但整體稍為咸了點 🍬甜品
可選豆腐雪糕、焙茶奶凍或焦糖布甸（後者+$18）。 * 🍨豆腐雪糕令人意外驚喜！豆味香濃，口感順滑，完全不甜膩 * 🍵焙茶奶凍，炭焙茶香同絲滑奶香完美融合，口感嫩滑，上面仲有紅莓同玫瑰花碎，既美觀又增添果香甜味 💚提子龍井（$34） 香甜飽滿的提子遇上清新馥郁的龍井茶，兩者完美融合！茶香幽雅不苦，提子甜度剛好，每一口都帶有清新果香，仲有軟嫩果肉增添豐富口感，甜中帶茶韻，層次十足，超級解膩又好喝！ 🍹余白水果茶（$34） 水果茶甜度適中，清新不膩！柑橘酸甜香氣突出，茶底帶輕微苦澀，增添茶香層次。整體清爽解渴，適合喜歡果茶帶點茶韻的朋友 🤤整體來講，套餐無論份量、質素同呈現都相當有水準，適合想食精緻日式料理嘅朋友，特別推介黑毛和牛配牛舌御膳，壽喜燒鍋同佢地嘅甜品

Pak mama 4 個月前

隱世工廈餐廳 今次收到餐廳邀請試食，見好似幾高質，咁就一於同老公試吓 我哋叫左2個御膳套餐 每個套餐都跟前菜(冰菜pama ham芝士沙律)、小食(關東煮)、茶碗蒸、湯、甜品 和牛左口魚邊釜飯（$288） 用釜上，溫度好滿意，亦有少少飯焦，好香口 上菜時店員會介紹唔同嘅配料伴菜(柚子醬油、Wasabi、紫菜碎、蔥花、醬油脆脆、辣蘿蔔蓉)以提升口感，最後仲可以整茶漬飯 左口魚經火炙，油香好豐富，加上和牛牛脂，令釜飯充滿甘香 牛肉肉質軟嫩 最驚喜係除咗有海膽及三文魚籽，釜飯底仲有菇菌，非常滿足 關東風極上三味壽喜燒鍋（$268） 肉類有三款，分別係A5和牛、M7和牛同十勝豚 三種肉都好食，嫩又有肉香。另外亦可以伴蛋食，更有口感 壽喜燒湯底唔係死甜，反而係比較淡香，唔會蓋過肉味另外鍋入面配有多款野菜，包括大蔥、南瓜、芋絲、娃娃菜、菇類 D肉份量都好多，仲有碗飯仔(店主可能太擔心大家唔夠飽) 甜品: 豆腐雪糕及伯爵焦糖布甸 個人認為布甸係值得加錢點: 上層有cream，沾上少少焦糖，口感好有層次，配上淡淡茶色，焦糖亦不會甜到苦，恰到好處！ 環境方面: 枱與枱之間好有空間，唔會有壓迫感或者覺得冇私隱

Liu Liu 4 個月前

[ 觀塘高質感日系極療癒之選 🍱 余白現煮和牛釜飯 x 濃厚壽喜燒鍋 🍳 ] 今次好高興收到餐廳邀請 💌✨，嚟到觀塘朝聖呢間人氣日式料理「余白」。一入到去最深刻嘅係佢哋嘅環境好大好寬落 ⛩️🌿，簡約嘅日系裝修風格令人感覺好舒適、好有空間感，喺度食飯真係可以好好放鬆 🌾🛋️。 食物方面真心覺得好正，由前菜一路食到甜品都好有水準 🍱🤤！跟餐嘅前菜沙律、煮物同埋蒸蛋都做得好到位、好滑溜 🥚✨。 主菜和牛.左口魚邊釜飯一打開蓋香氣四溢，左口魚嘅油脂滲晒入飯底，食落非常油潤有層次 🐟🔥；而關東風.極上三味壽喜燒鍋份量十足，入面有好多塊肉，肉質望落好靚、油脂分布好好 🥩🍲，入口軟腍帶甜，食完真係超級飽肚 😋👌。 最後甜品點咗焦糖布甸同焙茶奶凍 🍮🍂，布甸蛋香濃郁，奶凍嘅焙茶味夠回甘，為餐飯畫上完美句號 🍦💯。雖然係受邀試食，但不論環境同食物質素都好有誠意，總括而言非常推薦大家去試下 🎯👍！ 記得 follow 我 IG @hkfoodie_chubby，一齊發掘更多隱世好店！💖🥳 #觀塘美食 #香港日式料理 #余白

Florence Leung 8 個月前

最近發現觀塘工廈有間好正嘅日西fusion餐廳「余白」！🤩作為觀塘社畜嘅我，終於搵到新食堂了～ ✨ 新開無耐，裝修走簡約舒服路線，最正係枱與枱之間空間感十足，私隱度極高，完全聽唔到隔離枱講咩，可以靜靜地咁享受美食，又可以同朋友deep talk，個氛圍真係好放鬆、好舒服！👍 余白團隊都好friendly，用心介紹每一道菜式嘅心思。試咗個set dinner ，感受到每道菜嘅創新同誠意，值得支持！大力推薦！🫶🏻 🤍冰菜蕃茄沙律 冰菜超級爽脆，加埋清甜多汁嘅蕃茄，口感已經好豐富。撈埋酸甜嘅粒粒柚子啫喱，成個組合又清新又開胃！ 🤍佳日本時令生蠔 來自兵庫縣嘅生蠔，蠔身飽滿，甘甜爽口。面頭放咗魚子同蘿蔔蓉，入口有魚子嘅鹹鮮，再慢慢滲出蘿蔔嘅香味，好過癮！底層仲鋪咗切到好幼細嘅洋蔥絲同海帶。 🤍和牛他他多士 店員即場幫我哋撈勻牛肉同蛋黃。牛肉他他調味剛好，肉味濃，質地軟滑，帶有油脂香。多士烘到脆卜卜，一啖咬落去，口感一流，正！ 🤍茶碗蒸 絕對係驚喜之作！一打開蓋已經聞到陣陣海膽香。蒸蛋滑溜到不得了。入面材料好豐富。蛋入面仲有三文魚子同蟹柳肉等，每一啖都超鮮甜！ 🤍和牛三文治 麵包烘到微脆，入面塊和牛厚切，肉質柔軟，油脂極之豐富，一咬落去肉汁同油香滲晒出嚟。第一件原味食，淨係油香同肉味已經好好食。第二件點埋特製和牛醬，醬汁濃郁帶微甜，整個味道昇華到另一個層次，兩種食法兩種享受！ 🤍昆布漬牛舌 牛舌切到有一定厚度，外層煎到香脆，中心位保持粉嫩，口感爽滑彈牙！昆布鹹香，帶出牛舌嘅油脂香，同時又有解膩嘅作用，好有心思。 🤍吸物 鯛魚湯底鮮甜，白蘿蔔煮到好腍，吸盡晒魚湯嘅精華，好味。面頭嘅炸鱸魚保持到外皮香脆，浸一浸落湯，半脆半軟，魚肉依然嫩滑，兩種口感一次過滿足，好有心思嘅配搭。 🤍胡麻油甘魚 油甘魚刺身厚切，魚油甘香又肥美。特別在於佢嘅食法，整塊油甘魚捲住切碎咗嘅紫蘇葉，然後撈上香濃嘅胡麻醬一齊食。紫蘇葉清香，帶走魚腥嘅味道，解膩又清新。再有濃郁嘅胡麻醬，三種味道輪流登場。 🤍和牛壽喜燒 以關西風煮法，店員先落糖，待溶化後，再煎香和牛，香氣撲鼻！和牛點上蛋汁，口感更滑，肉味更甜。蔬菜索晒牛肉精華，甜到不得了。 🤍甜品 自家製伯爵茶焦糖雞蛋布甸，口感細滑，伯爵茶味好突出，茶香優雅，唔會太甜。上面鋪嘅食用玫瑰花瓣唔單止靚，仲帶嚟一陣花香，同伯爵茶味好夾。食完濃味嘅和牛，以呢個清雅又帶茶香嘅甜品作結，感覺圓滿。