春城銅鍋米線

Man Niki 3 個月前

🐷招牌海南胡椒豬肚雞紅薯粉 天氣熱辣辣當然要食番D辣野刺激下味蕾，這碗胡辣湯底的米線胡椒味唔算好重又唔會好咸處理得剛剛好，豬肚和雞件份量分配適中，豬肚食落林身仲有少少爽口唔會過韌，處理得唔錯冇豬羶味。雞件肉質都算滑仲好有雞味。 薯粉處理得唔錯口感Q彈，每條都好分明啖吸入湯汁後味道辣辣地好開胃。 🐔蟲草花椰子雞米線 食物遞上時已聞到好香的椰子味，真係未食已經流哂口水🤤。面層舖滿雞件，木耳和草蟲花相當足料。首先當然是先飲淡湯先啦！湯底充滿濃郁的椰汁味夠哂滋補。整碗米線份量都幾多，米線質感偏林身吸入湯汁一齊食會令人忍唔住一啖接一啖。雞件方面質感嫩滑仲幾重雞味。 🍤炸脆脆蝦膠豆卜 外層炸到酥脆的是豆腐皮，其食落口感似傳統臭豆腐面層的皮，味道好特別。內層的蝦膠相當足料咬開會見到由幾隻蝦製成，蝦味濃又夠彈牙。 🫔爆漿紅糖滋粑 紅糖糍粑一碟三粒外層酥脆可口，內裡軟糯口感煙韌咬開會見到紅糖有些爆漿的效果，香甜而不膩。 🍋凍檸檬茶 檸檬茶走甜少冰，味道清新茶底清澈沒有苦澀味相當解渴。

yeung shanna 3 個月前

之前去旺角嗰間舖頭食完一直都念念不忘，今次嚟到銅鑼灣就再嚟試吓呢一間餐廳，全部都係份量十足，我哋叫咗招牌豬扒酸酸辣辣米線，我手多多加多咗個肥牛，完全冇諗過我一啖米線一啖肥牛去到最尾啲肥牛都仲喺度，如果豬扒係另上，因為浸落個湯度搞到腍晒，呢樣好貼心，朋友就叫咗個蟲草花椰子雞米線，呢個係驚喜之作，個湯底一流，朋友最後飲晒所有湯，可想言之個湯係幾咁出色幾咁足料，我哋仲叫咗個小食係蝦膠豆卜，我開頭就話要五粒，個姐姐已經超級好人溫馨提示我哋個蝦膠好大粒，驚我哋食唔晒，我嗰陣仲諗豆卜啫有幾大粒，點知上到枱我發現我錯啦，每一粒都成個獅子球咁樣，真係飽到上心口

travel_heidi_jack 4 個月前

今日行開銅鑼灣渣甸街，路到呢間「春城銅鍋米線」，一於入去試試佢😍！用銅鍋上枱保温效果一流，仲好有特色添！ ⭐ 招牌春城銅鍋米線（小小辣） 配料非常豐富，有肉碎、芽菜、腐皮、酸菜、木耳絲同甜酸菜，湯底酸酸辣辣幾開胃👍！揀咗豬軟骨同新鮮牛肉。豬軟骨炆到好軟腍入味，軟骨位帶點爽脆；新鮮牛肉肉質嫩滑。 ⭐ 爆漿紅糖糍粑 呢個甜品做得幾到位😋！糍粑外皮炸到香脆，內裏煙糯，一咬開真係有爆漿嘅紅糖流出嚟，熱辣辣食非常好食👍。 ⭐ 凍檸檬利賓納 食完熱辣辣又酸辣嘅米線，飲返杯凍檸檬利賓納就啱晒😍！利賓納味道夠濃郁，加埋檸檬嘅酸味，飲落去酸酸甜甜，解辣、消暑又舒服😋。

Yue pu 4 個月前

發現一間喺銅鑼灣幾有驚喜嘅雲南米線🍜 首先一定要讚吓個招牌海南胡椒豬肚雞米線，湯底超濃郁，胡椒味夠晒香辣惹味，飲落個胃暖笠笠，豬肚洗得好乾淨、好爽口，雞肉都好嫩滑 另外個酸酸辣辣銅鍋米線叫咗「小小辣」，酸辣度啱啱好，五香牛腩燜到好入味、好軟腍，加埋雪花肥牛直情係雙重滿足！ 小食方面，炸脆脆蝦膠豆卜真係必點！外皮炸到脆卜卜，入面釀滿彈牙嘅蝦膠，點埋甜辣醬一齊食，惹味到停唔到口。香煎墨魚餅就煎到金黃香口，啖啖肉、好有咬口。 整體嘢食高質、份量又夠，兩個人食到飽一飽，性價比真係幾高，下次一定會再嚟過！

Hunger Food 4 個月前

最近睇咗 YouTube 見到龍威同子善介紹咗呢度招牌海南胡椒豬肚雞同蟲草花雞米線，見到佢哋食得咁滋味而且價錢好似幾抵，忍唔住要去試吓！ 食完之後，好同意佢哋嘅推介 - 胡椒豬肚雞湯底濃郁得嚟好暖胃，雞肉亦好滑，比起我哋另外叫嗰款米線，無論係湯底嘅層次定係配料都明顯更勝一籌。 湯底胡椒味濃郁但唔會嗆喉，帶出豬肚嘅鮮甜，飲落好暖胃。配料加$10 轉咗更鮮嫩嘅雞髀同鮮味十足嘅新鮮蠔仔 三鮮銅鍋米線香辣湯底，辣度唔算好辣。本身有豬潤、豬腩肉同螺旋藻。另外加咗鮮嫩牛肉同埋香脆嘅香炸豬扒，正常發揮。總覺得個銅煲仔好似比較雞湯細碗。配左凍咸檸七，不過個咸檸唔算好出個味 炸脆脆蝦膠豆卜必點！豆卜炸到外層好酥脆，入面釀滿咗彈牙嘅蝦膠，口感層次好豐富，沾埋啲湯汁食更加正。 墨魚餅煎得金黃，口感扎實彈牙，食得出真材實料，係一個滿足嘅小食。