十侍

WING HIU WONG 1 個月前

旺角隱世高質壽喜燒 旺角小巷原來藏住間超高質嘅A5和牛壽喜燒！店內環境寬敞雅緻，坐得好舒服。全程仲有專人代燒，掌控火候極之專業，完全唔洗自己動手就可以食到最極致嘅口感。 鹿兒島黑毛和牛A5（二人前） $898 和牛係鹿兒島直送兼附有認證證書，油花分佈得非常漂亮。入口即溶之餘仲好有厚度，肉汁超豐盈！最驚喜係佢哋嘅自家製打發蛋汁，口感空氣感十足，沾埋和牛食蛋香四溢。食完肉再煮埋野菜拼盤同真打稻庭烏冬，幼滑嘅烏冬吸盡壽喜燒湯底同和牛嘅精華，甜美又滋味。 串燒系列 牛舌芯 $58：厚切彈牙，邊位帶點微焦香，咬落去肉汁爆發。 雞肩嫩肉 $46：外皮燒得微脆，裏面嘅雞肉依然嫩滑多汁。 雞橫膈膜 $46：口感非常有嚼勁，雞味濃郁，配上醬汁非常惹味。 雞喉 $28：爽脆口感好特別，拿來下酒一流。 素拼串（秋葵、翠肉瓜、冬菇）$68：蔬菜新鮮多汁，剛好可以清一清口中的油膩感。 飲品 熱情林檎 $58：蘋果嘅甜加上熱情果嘅微酸，口感好清新。 青之海 $58：賣相好靚，酸酸甜甜非常解膩。 甜品仲有柚子雪糕，食得到粒粒果肉，果酸完美平衡咗雪糕嘅甜。整體嚟講十侍嘅和牛同串燒表現都好出色，環境又棒，絕對係朋友約會聚餐嘅好地方！

水豚覓食日記 1 個月前

搵餐廳嗰陣發現原來喺旺角呢啲咁方便嘅地方都有間高質壽喜燒，我係俾佢個棉花糖吸引咗，最開心係有專人幫我哋燒，唔使自己煩，都唔怕燒壞咗塊靚靚牛肉。 ‣ 壽喜燒二人前 $898 鹿兒島嘅黑毛和牛果然好食，仲有張證書俾你睇，證明佢真係出自鹿兒島。油脂分佈到好似大理石紋咁靚，專人燒到啱啱好，可以同佢講話唔使燒得咁熟，醬汁鹹鹹甜甜好入味。同埋一上枱就會見到棉花糖慢慢溶落去，我覺得甜得啱啱好。 而佢嘅蘭王蛋漿係呈泡沫狀，加埋塊牛肉依然做到好似瀡滑梯咁瀡入你喉嚨入邊嘅感覺，我覺得食壽喜燒就係追求呢啲，啲油香爆晒出嚟，超級爽、超幸福同滿足。 仲有個野菜盛盒，店員好貼心會幫我哋煮好，然後提我哋食咗啲烏冬先，如果覺得行得滯可以叫佢再加水，但係我自己就鍾意鹹啲，所以都冇特別再叫佢加。我自己幾鍾意佢烏冬嘅口感，相當煙靭彈牙，偏軟身。食完最後就送個雲呢拿雪糕俾你食，見到個雲呢拿雪糕中間仲有啲黑色雲呢拿籽就覺得好幸福。 ‣ 磯燒鱈魚乾 $68 作為餐前小食當然要叫鱈魚乾，烤到金黃香脆，咬落去咔嚓咔嚓響，點少少蛋黃醬同七味粉一齊食，越食越停唔到，五分鐘內都清咗碟。 ‣ 黑豚五花腩 $48 黑豚五花腩油脂迫晒出嚟，外皮燒到微微焦香，肥瘦比例啱啱好。 ‣ 牛舌芯 $58 燒得好彈牙、好爽口，加少少檸檬汁同餐廳比嘅芥末，我覺得都幾好食。 ‣ 素拼串（秋葵；翠玉瓜；冬菇） $68 食得太多肉，都想叫少少菜，我個人幾鍾意佢嘅冬菇同埋秋葵，佢嘅冬菇依然都係保持到個水份，唔會話變到乾柴柴，秋葵都係仲有好黏滑嗰種感覺，個人嚟講幾鍾意。 ‣ Netsui Ringo & Seasonal Fruit Soda $58/1 蘋果酸酸甜甜超級解膩，仲有幾塊蘋果喺隔離做裝飾。季節水果就係巨峰提子，呢杯簡直係平時我嗌開嘅常客，餐廳好有心機喺梳打隔離仲整啲花花做裝飾，成個餐點好啱打卡之餘，味道都相當唔錯。

Travel With Tsz 2 個月前

今日去咗旺角食壽喜燒，環境都幾舒服，座位夠闊落，入到去已經好有日式氣氛。 我哋叫咗Sukiyaki 壽喜燒二人前套餐，係選用日本鹿兒島A5黑毛和牛，有六大塊，一望落去真係覺得好值得。 而且最吸睛係佢會整棉花糖上個煎pan到，代替平時落的糖，更加打卡。 職員都會幫手處理壽喜燒，再放入日本蘭王蛋到，牛肉油脂分布好平均，入口即化，又夠肉味，大大啖好滿足。 壽喜燒配料都好豐富，有季節野菜盛合，竟然入面有蟹柳，跟住仲有烏冬同白飯，食落配搭好完善，唔會覺得只係得肉。 最後仲有甜品係雲呢拿雪糕，冷冷哋甜度啱啱好，完餐之後可以解膩。 除咗壽喜燒，我哋仲叫咗幾串串燒，包括秋葵、翠玉瓜、冬菇、雞肩嫩肉、雞頸肉。 啲串燒處理得幾到位，尤其啲蔬菜串同雞肉都唔會乾，估唔到食得出有水準。 飲品方面我哋嗌咗兩杯好打卡嘅嘢飲，真係一上枱就會想影相嗰嗰種！而且口感都幾清新，最重要係好適合女士飲，酒精味道唔會太重，好易入口。

Benedict Lai 3 個月前

☁️棉花糖湯底： 店員會喺你面前將巨型棉花糖放上鍋，即席淋上特製壽喜燒醬汁！火焰一燒，棉花糖慢慢溶化成焦糖甜香滲入湯底，畫面超療癒！湯底鹹甜完美平衡，入口順滑完全唔膩。 🥩 鹿兒島 A5 黑毛和牛西冷肉眼： 雪花紋理靚到好似藝術品！薄切啱啱好，喺湯底輕輕涮幾秒，入口即化，油香四溢，簡直係天堂級享受！ 🍳 雲朵蘭王蛋泡沫： 亮點是用專用槍打到好似雲咁 fluffy 嘅蘭王蛋泡！沾上牛肉一齊食，嫩滑度再升級，真係無敵！ 🥬 豐富野菜盛盒： 京蔥、燒豆腐、腐皮、皇帝菜同菇類等，全部吸飽湯底精華，超入味！ 🍜 稻庭烏冬 ： 彈牙烏冬吸滿甜鹹精華。 除了主打的壽喜燒，呢度嘅串燒同創意飲品都極有驚喜: 精緻串燒包括 雞上腿肉 外皮燒到金黃微脆，咬落去雞汁即刻爆發，肉質極之嫩滑！ 雞肩嫩肉 稀有部位！口感帶點獨特的彈牙與嚼勁，雞味濃郁，配酒一流！ 素拼串 (有齊秋葵、翠肉瓜同冬菇，) 燒得啱啱好，保留到蔬菜本身嘅清甜同水分，正好平衡返和牛嘅油膩感。

LaHaMo 8 個月前

十侍-棉花糖A5和牛壽喜燒專門店位於旺角豉油街，要搭升降機上去，入口有少少難搵。不過，少少困難係阻止唔到我哋搵好嘢食嘅決心。 因為突發有事要慶祝，所以六點幾先打去book枱。好彩仲有bar 枱位可以Book ，唔使等位。去到餐廳一坐低就落左set $898的鹿兒島A5黑毛和牛套餐，另外可以加$198 要埋串燒拼同兩杯冇酒精飲品。 ……………………………………………… 鹿兒島A5黑毛和牛套餐 ⭐️⭐️⭐️⭐️⭐️ 套餐$898 包括約每人180g的鹿兒島A5黑毛和牛西冷肉眼、前菜、季節野菜盛合、自家製壽喜燒醬汁、日本蘭王雞蛋、讚岐烏冬或日本米飯 同埋 自家製雪糕。 ⭕️ 鹿兒島A5黑毛和牛西冷肉眼⭐️⭐️⭐️⭐️⭐️⭐️ 每人有大約180g嘅肉。肉眼會用一個木盒好靚咁樣裝住，仲會有一張由鹿兒島黑牛黑豚銘柄販売促進協議會發出嘅證書。 店員會一塊一塊咁幫你煮好夾落你個碟。肉眼油脂分佈均勻，入口即溶，好好味。180g每人有3大片，好食到唔夠喉。 ⭕️ 自家製壽喜燒醬汁 ⭐️⭐️⭐️⭐️⭐️ 店員會先製作一個棉花糖，然後將自家製嘅壽喜燒醬汁倒落棉花糖上面，兩者最後溶為一體，十分特別，係屬於關東風嘅壽喜燒。 ⭕️ 前菜 ⭐️⭐️ 主要係海帶漬物，味道口感都麻麻地，而且分量好少。 ⭕️ 季節野菜盛合 ⭐️⭐️⭐️⭐️ 盛合有娃娃菜、冬菇、金菇、本菇、豆腐卜、豆腐、大蔥、蟹柳等，食材新鮮。 ⭕️ 日本蘭王雞蛋 ⭐️⭐️⭐️⭐️⭐️ 店員會將日本蘭王雞蛋打落一個好特別的金屬容器，再將攪勻好的蛋液打成慕絲狀比我哋點牛肉，十分特別，蛋香味濃郁，口感細滑。 ⭕️ 讚岐烏冬 ⭐️⭐️⭐️⭐️⭐️ 烏冬好滑好彈牙，用壽喜燒汁煮到甜甜地，好味。 ⭕️ 自家製雪糕 ⭐️⭐️⭐️⭐️ Vanilla 雪糕，好味。 串燒 Set ⭐️⭐️⭐️⭐️⭐️ 一共有五串，包括翠肉瓜、冬菇、秋葵、雞肉同 雞軟骨。即叫即燒，翠肉瓜、冬菇、秋葵都燒得剛剛好，充分保留到水份同蔬菜的口感。而雞皮都燒到脆卜卜，雞肉Juicy。 巨峰提子乳酸梳打 ⭐️⭐️⭐️⭐️⭐️ 餐廳即調的梳打飲品，甜度剛剛好，不過細杯左啲。 ……………………………………………… 十侍用的食材都好高質素，製作亦都好用心。不過，我個人比較喜歡關西風的壽喜燒。如果鐘意食關東風壽喜燒，十侍絕對係唔錯嘅選擇。