中華小館

Barryippy 2 個月前

同朋友去咗灣仔嗰間「中華小館」食晏。鋪頭裝修幾有特色，牆上有啲中式木雕，仲有個大玻璃櫃掛住啲燒味。 我哋兩個人點咗個$438嘅「二人套餐」。開頭嚟咗個「滋潤燉湯」，用個砂壺上，入面有好多料，味道都幾足。 之後係「燒味雙拼」，可以揀叉燒同燒肉。兩樣都幾好，叉燒唔會太瘦，燒肉皮都算脆。 小菜有「翡翠帶子蝦仁」同「蒜蓉炒菜苗」。帶子蝦仁幾鮮，炒得OK；菜苗就正正常常，無咩特別。 除咗飯之外，餐尾仲有得揀甜品或糕點。整體嚟講，份量好夠，食物水準都對得住個價錢。計埋茶位、小費，兩個人食咗$515。喺灣仔呢個地段，都算係個抵食嘅選擇。

Muimui TKO 2 個月前

環境5分： 中餐廳灣仔地舖樓底高，好光猛，門口大大個魚缸好搶眼，環境舒適可以畀五分。 衛生5分： 餐枱上面有餐紙巾，濕紙巾，牙籤，非常齊全，乾淨企理，衛生一樣畀五分。 服務5分： 服務員人手好足，加茶非常主動，走時不停多謝，態度非常友善同落力，滿分。 味道5分： 1) 蜜汁厚切叉燒皇一客有八件，件件都真係非常厚身，夠鬆又juicy，直頭好似食緊叉燒扒咁，送飯一流，一定要試！ 2) 乾逼拆蟹肉粉絲煲即場响張枱度撈，Ｄ粉絲乾身唔油，蟹肉香口又夠幼嫩，啖啖肉唔洗煩，少少麻辣好惹味！ 抵食5分： 每人兩百幾蚊有飽肚高質素嘅特式中菜，有肉有海鮮，真係非常之抵，滿硬分。

Turfy Leung 2 個月前

今日同朋友去左灣仔食中菜，呢間中華小館地點非常就腳，一出地鐵站行1分鐘就見到。 餐廳中式裝修，古色古香，環境乾淨企理，感覺幾好。餐牌選擇都幾多，有套餐又可以散叫。朋友發辦點左半隻雞同炒左兩款小菜，再加一碗白飯。 雲耳青瓜：餐前小食，青瓜拍得好脆口，索晒啲酸辣汁，非常入味；雲耳爽口彈牙，整體味道酸酸辣辣、冰冰涼涼，夏天食一流，開胃晒！ 玫瑰豉油雞：雞皮做得好爽滑，雞肉嫩滑，連雞胸肉位都完全唔會柴。豉油汁調得啱啱好，好香玫瑰露酒味，帶點微甜，唔會死鹹，腌得入味，唔錯。 蒜片牛柳粒：牛柳粒切得啱啱好一口一粒，外層炒到有少少焦香，鑊氣十足，咬落去中間仲好 juicy、好軟腍，牛味濃郁。炸蒜片脆卜卜又夠香，同牛柳一齊食就最夾，好惹味。 蒜蓉炒白菜仔：食咗咁多肉，要食碟菜平衡返。白菜火喉控制得好好，炒得青綠爽甜，帶點淡淡蒜蓉香，成碟菜好清爽，唔會油淋淋，剛好中和返肉類嘅油膩感。

Pei 3 個月前

中華小館行精緻中菜路線，環境同氣氛都唔錯。我哋兩個人點咗幾款招牌菜式，攤番個happy lunch! 坐低先上茶水，揀左香片熱辣辣，入口回甘，質素唔錯。 第一道送上枱嘅係蜜汁厚切叉燒皇，呢道菜可以話係佢哋嘅招牌菜，叉燒真係切得好厚身，食落好有肉質感。外皮燒到帶少少焦香，邊位微燶，蜜汁嘅甜味啱啱好包裹住成件肉，唔會過甜。肉質肥瘦均勻，入口軟腍之餘仲帶點油脂香。 之後係蒜片牛柳粒，雖然標明係小食份量，但份量都唔小。牛柳粒切得大粒，煎得啱啱好，入面仲保持到肉汁，口感非常嫩滑。上面灑滿咗炸到金黃酥脆嘅蒜片，蒜香味好突出，同牛柳粒非常之夾，惹味得嚟又唔會覺得油膩。 主食方面仲點咗一份乾蔥豆豉雞。呢道菜一上枱就好吸睛，因為用煲仔上，上枱就聞到好香嘅豆豉同乾蔥味，賣相好吸引。雞件切得大細適中，炒得好夠鑊氣，雞肉嫩滑而且好入味，乾蔥嘅甜味同豆豉嘅鹹香完全滲透入雞肉入面，味道濃郁，係一道好傳統、好送飯嘅粵菜。 飯粒煮得粒粒分明，軟硬適中，吸埋叉燒嘅蜜汁同豆豉雞嘅醬汁真係無得頂，但作為配角不可或缺。 總括而言，我同朋友都覺得食物質素相當理想，無論是叉燒嘅厚度同調味，定係炒餸嘅鑊氣都做得好到位。如果想同朋友或者屋企人舒舒服服食餐精緻中菜，呢度依然係一個唔錯嘅選擇。

sunseeker foodie 4 個月前

去咗中華小館食lunch，整體真係幾有驚喜。 最鍾意係蟲草花蒸滑雞，雞肉蒸得非常嫩滑，入口仲帶少少酒香，個味道幾出，唔會淡而無味，反而愈食愈順口。 手工蓮藕煎豚肉餅都好有誠意，肉餅有咬口，食到豚肉本身嘅香氣，入面仲有蓮藕絲，令口感多咗層次，煎得香而唔油膩，幾加分。 翡翠炒帶子蝦仁就好有鍋氣，西芹爽口，炒出嚟帶有香氣，帶子同蝦仁都保持到鮮甜。成餐菜式雖然都係家常中菜路線，但味道同火候都掌握得唔錯