綠茶餐廳 (希慎廣場)

Amy 2 個月前

黑胡椒杭州叫花雞用荷葉包裹焗製，撕開瞬間香氣四溢。雞肉嫩滑多汁，黑胡椒香氣濃郁但唔會搶走雞嘅鮮味。綠茶蝦餃入面嘅蝦仁大大隻，非常彈牙鮮甜，皮薄餡靚，絕對係高質點心。五色臘味焗飯有驚喜！上枱熱辣辣，臘味香氣撲鼻。臘味足料，鹹香得來又唔會太肥膩，五色食材配搭令賣相繽紛吸引。飯粒乾身，醬汁惹味，食完一啖又想再食。 懷舊米漿非常濃郁，質地順滑，甜度適中，飲落暖笠笠好舒服，$18呢個價錢，真係好抵飲。

Wing_thefoodie 2 個月前

綠茶 Green Tea 平時去銅鑼灣都鐘意上希慎搵食，貪佢方便，而且近排成日落雨，入商場食就最穩陣。12樓有間綠茶餐廳，每季都有新嘅時令中菜，幾特別。 韭菜蝦仁薄脆餅香口惹味，薄餅邊位酥脆，內裡韭菜香氣突出，蝦仁彈牙，屬於很討喜的前菜。 竹笙烏雞湯湯色清澈，入口鮮甜溫潤，竹笙爽脆、烏雞肉質細嫩，火候同用料都講究。 翠綠麻婆豆腐係春季特別菜之一，保留了麻辣神髓，但沒有過份搶味，豆腐嫩滑帶汁，翠綠主要由菠菜做出，令賣相更清新。 龍井烤雞茶香淡淡滲入雞皮同肉汁之中，外皮微脆而肉質依然多汁，平衡得很好。 最後配龍井檸檬茶，清爽解膩，帶少少茶澀同檸檬酸香，令整頓飯收得乾淨利落。 整體而言，味道、火候同配搭都到位，難怪平日都滿座。

Penny Sun 3 個月前

銅鑼灣打卡必去古風浙菜餐廳 集精緻、新派、又高CP值嘅浙菜餐廳？🍴 綠茶餐廳絕對係必bookmark嘅選擇！🔥 餐廳用上「古風」裝修，環境超靚，坐低已經好有氛圍，chill爆～打卡位同食物質素一樣高💚 加上性價比高，價錢合理得嚟又唔失質感！ 不論約姐妹聚會，定係lunch time小休放鬆都一流，感覺都幾浪漫同寫意！ 最近仲推出左會員app，有迎新優惠😍，即刻開心多咗一重驚喜😍 今日午餐，重點推介👇👇 醬滷牛腩配荷葉餅 HK$168 原來用咗牛坑腩，牛味超香濃，肥瘦啱啱好，配埋荷葉狀小飽片，食落層次好豐富，完全唔會膩。 福祿滿園點心小拼 HK$36 成個感覺就係食藝術品！ 紅棗包、喜糕、翡翠紅豆糕、蘋果包，每款造型都靚爆鏡。 紅棗包餡超健康🫘，翡翠紅豆糕煙韌清新💚，🍎蘋果包香甜可愛，❤️仲有喜糕，足料有驚喜 粉絲裹蝦 HK$108 蝦彈牙得嚟又juicy，粉絲索晒醬汁，炆得好入味，即場為你開爐煮，儀式感滿滿，香到爆 金桔檸檬茶 HK$28 🍹 有超可愛熊仔造型，絕對係打卡神物！飲落清新又解渴🥤

peggy Apple 上次編輯：4 個月前

入「綠茶餐廳」食春天．龍井蝦餃＋醬滷牛腩荷葉餅超正！ 香港人個個都OT精，嗰日同同事搞掂個死線project， 兩個人都散晒，唔想再食茶記頹飯。同事話不如食好少少， 就拉咗我去希慎廣場嗰間 「綠茶餐廳」 。 一入門口，嘩，成個感覺唔同晒，唔似嚟食飯， 似瞬間穿越去咗江南水鄉，小橋流水、 煙雨迷濛嗰種詩意，成個人即刻放鬆咗。 我哋兩條友餓到前胸貼後背，一坐低見到佢哋個 「春響知味」 春季限定Menu，即刻心心眼。春天嘛， 喺香港都可以食到成席江南嘅清潤細膩，真係OT後嘅小確幸。 先講茶位，人哋係普通普洱香片，佢哋係龍井綠茶。 個茶湯清澈淡綠，入口清爽微甘，仲有股豆香， 未食飯先飲兩杯，好似成個人都被洗滌咁， OT嘅疲勞散咗一半。 同事就嗌咗杯鳳梨檸檬茶，賣相已經贏晒—— 上面有隻小熊造型嘅冰冰，浮喺茶面勁可愛！ 飲落酸甜醒胃，鳳梨嘅香氣同檸檬好夾，唔會過甜，啱晒打卡。 主食方面，我大推個粉絲裹蝦。 佢係即席喺你面前煮嘅，有個小爐燒熱個鍋， 睇住啲蝦喺粉絲上面慢慢變紅， 「滋滋聲」嗰下最誘人。粉絲索盡蝦頭嘅鮮甜同秘製醬汁， 入口彈牙又爆汁，熱辣辣食真係人間極品。 視覺聽覺味覺三重享受，治癒！ 跟住個綠茶蝦餃，三件一籠，皮薄到透光， 隱約見到入面橙紅嘅蝦肉。一咬落去，皮煙韌唔黏牙， 餡料紮實彈牙，仲有淡淡茶香balance返蝦嘅鮮， 果然係招牌江南點心。 重中之重，一定要講醬滷牛腩配荷葉餅。 呢道係春天必食，據講用桐鄉老法工藝， 小灶慢火醬滷幾個鐘。牛腩炆到軟糯入味， 醬香濃郁但鹹中帶甘，一啲都唔膩。 配埋四個軟韌有彈性嘅荷葉餅，將牛腩夾入去， 一啖咬落——醬香、肉香、麵香三層交織， 暖笠笠，真係有種江南人家屋企飯枱嘅溫馨感覺。 OT之後，兩個人靜靜哋坐喺度， 食住呢一席江南春天， 傾吓閒計，成個人都被滋潤返。 餐廳：綠茶餐廳 地址：銅鑼灣軒尼詩道500號希慎廣場12樓1202號舖

Mic H 5 個月前

綠茶4月新推出左春響知味春季雙人套餐，保留左杭州江南嘅清新 黑胡椒杭州叫花雞用乾荷葉包裹，烤到外皮金黃微焦，帶住陣陣黑胡椒辛香同荷葉清香。侍應會先剪開荷葉，再剪埋隻雞，方便進食。雞肉嫩滑多汁，皮脆卜卜，黑胡椒入味層層滲入，每一口都有微微辣香，完全係傳統叫花雞嘅升級版 翠綠麻婆豆腐，顏色鮮綠，有啲特別，唔會死鹹，辣度適中，配埋青菜碎、皮蛋同辣椒，食落又滑又香，好送飯 綠茶蝦餃皮薄到透光，餡料鮮甜彈牙，一咬爆汁，綠色外皮仲帶淡淡茶香。綠茶龍井米糕，造型似葉子，鬆軟帶點Q彈，茶味清幽，食完完全唔膩。 涼拌馬蘭頭係最有驚喜嘅一道菜，平時好少見，係層層疊疊嘅碎菜，賣相打卡爆燈，食落清新爽脆，好健康又解膩。 呢個2人餐份量啱啱好，飽肚得黎又唔會好油膩