御瀧軒 (銅鑼灣)

Ray Tang 1 個月前

藏於南華會的低調私房級中菜：匠心粵菜新體驗 「御瀧軒」這餐廳位於銅鑼灣南華會地庫，定位中高端粵菜酒家，品牌整體呈現代中式與老香港的優雅格調，有華麗水晶吊燈及灰藍色主題牆，帶點氣派的奢華氛圍。 店內空間極為寬敞，非常明亮，桌與桌之間的距離非常寬闊，完全沒有傳統酒樓的擁擠與喧囂，整體衛生及環境達宴會級質數。 百味脆豆腐 ($88): 外表呈現金黃色澤，表面均勻撒上一層薄薄的椒鹽，完美體現外脆內嫩的鮮明對比，外層薄衣酥脆乾爽而不油膩，內裡則保持如豆腐花般入口即化的綿密與濕潤口感，食得出豆香，算幾好食。 黃金蟹粉脆蝦球 ($248): 碩大飽滿的蝦球宛如金黃色的繡球，個頭十分巨大，外層包裹著一層厚實的蛋黃蟹粉醬汁，醬汁濃稠綿密，咬下去時蝦肉呈現極致的爽口與彈牙，鮮嫩多汁，一入口是滿腔甘香濃郁的蟹膏鹹鮮與蟹肉甜美，但無遮蓋大蝦本身的鮮味。 娘惹咖喱汁配德國脆皮豬手 ($288): 這道菜融合中西東南亞風格，巨大的德式豬手外皮微脆帶點軟糯Q彈嘅脂肪，但未去到爆脆口感，裡層的豬肉與筋膜則軟腍入味，膠質滿滿，沾上濃醇的娘惹咖喱汁後更加滑順，亦正好中和了豬手的油膩感，風味獨特且非常下飯。 蝦乾肉碎乾鍋椰菜花 ($188): 椰菜花炒至微焦，呈乾鍋特有的焦香色澤，加入蝦乾及碎肉末，鑊氣十足，椰菜花保持爽脆的口感，不會過於軟爛，吸附了乾鍋、蝦乾、肉碎的焦香油份，非常惹味，蝦乾則帶來微韌與嚼勁，口感層次豐富。

Bubble Shum 2 個月前

第一次嚟，環境好大好舒服，可能係閑日關係都有很多枱🥰 揀咗坐喺電視機隔籬一路食飯一路睇新聞😎 今晚嗌咗幾個餸，開胃菜係麻辣芝麻醬，都真係好好食，好開胃。 而水煮牛係最出色嘅一碟菜，牛肉好鮮滑，亦都好入味～ 而冰鎮咕嚕肉都好特別嘅處理感好脆😍試埋招牌炒飯，非常之香口有鑊氣！

Koo Joey 2 個月前

今晚同屋企人去咗南華會御瀧軒食飯。一入到去就覺得個環境好舒服，空間感十足，完全唔會有種好逼既感覺，坐得好舒服！ 我地叫左5個餸 每碟餸擺盤都好精緻，影相打卡一流。 金牌燒鵝皇 - 皮脆肉嫩，香氣四溢，配埋特製醬汁一齊食更加惹味，不愧為金牌之作。 龍皇冰鎮爆汁咕嚕肉 - 上枱一刻見到條金龍係面前飛過，當店員放低時睇清楚先知原來係咕嚕肉。當下先聲奪人創晒focus。 金龍底層鋪滿碎冰，將咕嚕肉藏在其中。冰鎮既做法令到咕嚕肉外層糖衣變得脆口，咬落去裡面熱辣辣，肉質保持嫩滑多汁，每件肉都包住少少菠蘿，酸甜比例恰到好處，將一碟普通既咕嚕肉提升到另一個層次，開胃又過癮。 黃金蟹粉脆蝦球 - 蟹粉甘香豐腴，大蝦球鮮甜彈牙，外層炸至金黃酥脆，內部飽滿多汁，再加埋香脆鍋巴享用，口感更豐富。 蝦干肉碎干鍋椰菜花 - 焦香既肉碎與蝦干既鮮味完美融合，加埋菜花既清脆口感，簡直係相得益彰。 廚皇招牌炒飯 - 飯粒分明鑊氣十足，加入脆米落去令口感極其豐富，好食到停唔到口。 飯後仲送上免費糖水-陳皮红豆沙，微沙既口感與陳皮既甘香，為整餐晚飯畫上完美句號。 總結：師傅係調味同擺盤上真係落咗唔少心機，每一道菜都感受到廚師既誠意，成餐飯由環境到味道都好滿意，如果咁啱想搵個地方同屋企人慶祝，或者同老友聚舊，呢度絕對係首選。

Hipsterlife 5 個月前

🍽️ 隱世私房菜驚喜！ 御龍軒服務一流，幾款菜式食到停唔到口😋 最近發現咗呢間御龍軒隱世私房菜，一入到去已經感覺到企理乾淨，大體有氣派✨。侍應每個人都非常有禮貌，服務態度親切舒服🙌 必試小食 椒鹽九肚魚！賣相非常吸引，九肚魚炸得乾身唔油膩，外脆內嫩，椒鹽香口，絕對係開胃一流選擇🔥 花雕醉海蝦一樣出色，海蝦又大隻又爽口彈牙🍤，帶陣陣花雕清香，酒味香而不濃，超正！ 傳統鳳梨咕嚕肉做得清新版，炸粉唔厚，有薄脆效果，菠蘿酸酸甜甜，開胃又唔膩🍍 惹味蝦球蟹籽粉絲煲超級惹味，粉絲吸滿海鮮精華，好食到令人一啖接一啖，不知不覺就食咗幾碗！🥢 最後推 淮杞珍珠浸菜苗，蔬菜選擇多樣，新鮮健康🥬，適合一家大細過嚟，滋補又清爽～ 整體嚟講，御龍軒無論環境、服務定菜式都令人滿意👍，無論家庭聚餐定朋友小聚都啱。強烈推薦大家去試吓！ 🏡 御龍軒（銅鑼灣） 📍 銅鑼灣加路連山道88號南華體育會體育中心(高座)UB樓 ⭐ 推介指數：★★★★★ 👨‍👩‍👧‍👦 適合：家庭 / 朋友聚餐 / 想食精緻私房菜 （真實食評，菜式值得回訪！🍴）

Edith 6 個月前

今日同老公去銅鑼灣南華會打保齡，打完波就去地庫間「御瀧軒」食晚飯。一入去有驚喜，裝修幾典雅，有氣派得嚟又唔會好拘謹，座位好寬敞，枱同枱之間距離夠遠，可以慢慢坐慢慢傾，食餐安樂茶飯。 我哋叫咗個小食，「百味脆豆腐」$88，熱辣辣，外脆内軟，椒鹽惹味，豆腐嫩滑，好香口。 小菜方面，我哋叫咗360牛乳黑松露滑蛋蝦球（$188）蛋炒得嫩滑，松露香氣濃郁突出。蝦球大大粒，口感爽甜彈牙。兩者配合得恰到好處，滋味滿足。「燒汁慢煮牛肋骨」$368 全晚MVP🏆，慢煮牛肋骨肉質軟腍，筋膜位膠質豐富，醬汁入味，肉味香濃。「乾鍋椰菜花」$188，熱辣辣煲仔上桌，香氣撲鼻。椰菜花清甜爽脆，吸收肉碎與蝦米的鹹香，微辣調味恰到好處，確是道極之惹味的家常菜。 今晚全部小菜都非常高質，食得出師傅心機，味道層次分明，唔會一味得個鹹字，係一餐高級粵菜體驗。 服務方面，店員細心有禮，周到，食物質素高，響銅鑼灣嚟呢個價錢非常合理。整體環境坐得好舒服，最啱慢慢嘆。另外餐廳亦有提供接駁的士優惠或者免費泊車優惠（二選ー） 如果選擇步行的話，地鐵站行過嚟約十分鐘，不過為咗好食嘅嘢，行多幾步都值得。