Tango Argentinian Steakhouse (LKF)

Katsuo Fish 2 個月前

餐廳裝潢時尚開揚，整個氛圍令人舒適放鬆；嚟得呢度當然要試Porterhouse Steak有成1KG，啱哂牛魔王嘅我哋。 🥩Porterhouse Steak 1KG with Bottomless Fries ($998) 煎到外焦香內juicy，中間有一個T字型骨，可以同時品嘗到菲力及西冷嘅滋味，菲力脂肪雖少，但口感軟嫩細緻，肉味清甜，西冷相對較有口感，牛味亦較菲力濃郁，兩者各有特色，一次食到兩款不同部位嘅口味。 🧂同時跟咗自家製6款醬汁，有辣有香，牛扒蘸上不同嘅醬汁，各具風味。 🍟食牛扒之餘仲有無限追加薯條，熱辣辣脆卜卜，超正。 🥟Empanadas $98 充滿阿根廷風味嘅餡餅，餡料有雞肉、牛肉及菠菜，炸到熱辣辣，外酥脆內juicy，雞肉口味偏清淡，牛肉口味最濃郁，菠菜口感清新亦帶有芝士拉絲感。 🍷Gaucho La Linda Malbec $50 每日都有半價優惠時段，啱哂我哋喇；紅酒酒體飽滿，果味濃郁，配搭牛扒一流。 🥖順帶一提餐前送上嘅穀物酸種麵包，上檯時熱辣辣內鬆軟外香脆，好好味。

delish_ hk 3 個月前

位於蘭桂坊嘅樓上扒房，環境闊落，溫暖嘅燈光、木質調裝潢再加埋燭光，氣氛浪漫。呢到主打阿根廷式牛扒，用嘅都係嚟自阿根廷拉潘帕省，經過21日熟成嘅優質草飼牛肉。 菠菜布旺倫芝士洋蔥濃汁餡餅（$68） 炸到金黃酥脆嘅餡餅上枱時仲係出緊熱煙，一刀切落去就聽到清爽嘅「喀嚓」。內餡嘅菠菜同布旺倫芝士濃郁得嚟又唔膩口，加埋濕潤嘅洋蔥濃汁更加提昇咗整體層次。 海鮮拼盤（$248） 拼盤包含咗3種海鮮，鱸魚刺身薄切晶瑩剔透，配埋老虎奶醬汁、墨西哥辣椒同芫荽，入口爽嫩清新；烤老虎蝦肉質緊實彈牙，加埋蝦膏嘅甘香，鮮味喺口中縈繞；最後仲有烤八爪魚，口感爽彈煙韌。 肉眼牛扒400g（$418） 叫咗三成熟，牛扒用鐵板上枱，餘溫會將牛扒輕輕再加熱。牛扒外邊煎得香脆，中心保持住粉紅色，肉質腍嫩細緻，入口有滿滿嘅肉汁同肉香。牛肉經過熟成味道更加鮮甜，仲有成6款醬汁可以點嚟食，好似芥末、茄汁、莎莎、乳酪、辣椒醬等等，令種都帶出牛肉唔同嘅風味。 Peated Pisco Sour（$88） 飲品方面呢到都有好多特色cocktail，呢杯Pisco Sour除咗有濃烈嘅酒香，仲有檸檬嘅清爽同薑嘅辣勁回甘。 Virgin Mojito（$58） 呢杯冇酒精飲品就用咗清新嘅薄荷同青檸加入梳打水調製，消暑解膩。 。 。 TANGO Argentinian Steakhouse (中環) 中環蘭桂坊15-16號協興大廈2樓 。 。

Foodiegraphy 3 個月前

Tango Argentinian Steakhouse 藏身蘭桂坊協興大廈二樓嘅Tango Argentinian Steakhouse，係一間主打正宗阿根廷牛扒🥩嘅專門店。歐式古典紅磚牆，配上柔和嘅燈光同埋拉丁音樂，勁有情調💃 自家製酸種麵包🍞 + Welcome drink🥂 酸種麵包有驚喜，打咗半個鐘打開都仲會有煙出✨，外脆內軟，配上牛油🧈好滿足。 Carnes Bife de Ancho 肉眼牛扒 Ribeye🥩 (400g) $418 肉眼選用阿根廷草飼牛肉，肉味較濃。揀咗Medium，外層微焦帶炭火香，肉嫩並充滿肉汁。附上六款自家製醬汁🥫，從經典阿根廷青醬到辣番茄醬，每一啖都有新鮮感，個人嚟講覺得芥末醬最啱我心水。 Frutos Del Mar: 海鮮拼盤 配 鱸魚薄切 烤老虎蝦 烤八爪魚 Seafood Tasting Platter $248 鱸魚🐟薄切以Ceviche方式處理，微酸微辣幾開胃。烤老虎蝦外殼微焦幾香🦐，八爪魚就較韌難咬🐙。份量唔多，兩個人食只可以每人試少少。 Empanadas: “Espinaca” 菠菜布旺倫芝士洋蔥濃汁餡餅 $68 阿根廷最具代表性嘅國民小食。餃子嘅外型🥟加上金黃酥脆嘅外皮係幾得意，內餡就好似芝士菠菜咁，味道就唔算太特別。

RS 12 4 個月前

位於蘭桂坊，主打阿根廷菜扒房，深木磚牆環境優雅舒適。Brunch Set只需$298，包前菜、主菜、配菜及甜品，CP值高。餐前包外脆內軟；前菜有炭香濃郁烤阿根廷香腸、多汁鮮甜烤蔬菜沙律同輕盈酥脆自家製餡餅。主菜揀左封門牛柳扒外焦內嫩同酥脆嫩滑油封鴨腿。配菜有焗烤芝士椰菜花同蒜香杏鮑菇夠惹味。甜品有香脆西班牙炸條、綿密焦糖布甸同濃郁朱古力雪糕百香果雪葩，份量十足，質素驚艷。

水豚覓食日記 5 個月前

餐廳成個氛圍都好適合情侶或者朋友聚會，蘭桂坊又多咗一間有情調嘅扒房可以揀。一上枱個餐包都覺得餐廳幾有心思，餐包佈滿唔同嘅nuts，外脆但內軟，牛油亦都將小麥味同堅果香發揮到出嚟。 我自己最欣賞都係餐廳有唔同嘅醬汁做搭配，我個人都係最鍾意阿根廷青醬同莎莎醬，朋友就比較鍾意芥末醬，呢個都係我哋鍾意阿根廷扒房嘅原因，醬汁令到牛扒味道豐富啲，唔會咁單調。 ‣ Seafood Tasting Platter $228 海鮮拼盤係包含三文魚刺身、烤虎蝦同埋吞拿魚他他，我自己幾鍾意佢嘅柑橘醬，搭配三文魚酸酸甜甜，相當之開胃。而吞拿魚他他嘅吞拿魚入口都幾軟綿，就咁搭配豉油，已經好好食。虎蝦本身爽口彈牙，蝦頭滲出嚟嘅蝦油蝦膏，搭配餐包一齊食，都係一個幾唔錯嘅食法。 ‣ Tires de Asado Shortribs $438 阿根廷牛扒真係冇得輸，一上鐵板個浸肉香就飄散出嚟。嗌咗五成熟，切開個色澤係好靚嘅粉紅色，肉汁都鎖死。牛肋排嘅牛味極之濃郁，油脂分布得好平均，咬落去非常有嚼勁。表面燒到微微焦香，帶點炭火味，唔需要落太多調味，就咁加少少鹽已經將啲牛肉鮮味發揮到極致。 ‣ Thyme Skinny Fries $78 薯條都真係好大兜，我自己都幾鍾意幼薯，就算擺好耐都好都唔會變得好軟腍腍。呢一個份量其實兩個人嗌杯酒，然之後食住談心都係一件樂事。