The Steakhaus

KH L 2 個月前

第一次試依間餐廳，​入到去覺得環境非常舒服，燈光柔和、枱與枱之間有足夠嘅空間，非常適合情侶約會或者同朋友傾偈談心（目測唔少姊妹傾偈/3-4位朋友短聚） ​我今次叫咗依d ​香草羊架 🍖 火候控制得剛剛好！入面嘅羊肉保持粉嫩多汁，肉質好嫩滑，配埋佢提供甜甜酸酸既醬汁（好似啫喱咁）好開胃！ ​半熟刺身紅蝦卷卷意粉 🦐🍝 紅蝦刺身幾鮮甜，半熟狀態鎖住了蝦肉嘅鮮味與蝦膏嘅濃郁。卷卷意粉好吸汁，每一條都掛滿濃郁嘅紅蝦精華醬汁，口感彈牙，食落超級滿足！ ​Tiramisu 入口即溶、口感非常絲滑，餅底濕潤度剛剛好，層次好豐富。

wuso_foodie 3 個月前

💚 開心果控+食肉獸天堂！ 夜晚8:30去到見到全場爆滿，好彩一早預約咗！呢度裝修好靚，整體性價比極高，可以話係抵食得嚟又唔失禮，啱晒兩個人簡簡單單慶祝，或者幾個人一齊聚餐。雖然佢唔係用最貴最靚嘅頂級食材，但係無論賣相同味道都一啲都唔馬虎，非常用心，尤其係幾款有開心果元素嘅野食同飲品，配搭超有心思！ 🥩 澳洲M3和牛西冷配開心果青醬及火箭菜 呢個M3和牛絕對係全晚亮點！最特別係佢配咗出面好少見嘅自家製開心果醬，醬汁中間竟然加入咗少少芥辣，仲特別撒上開心果碎同其他香料。入口除咗有極度濃郁嘅開心果香，仲帶有一絲芥辣嘅微辣同香料層次，同牛脂嘅油香夾到軟腍腍。最驚喜係配埋側邊嘅火箭菜一齊食勁香口勁正，加上少少黑椒調味，令成個牛肉嘅鮮味再掹高一個層次！ 🐑 香草羊架配脆薄荷葉 羊架用咗慢煮處理，所以肉質保持到好嫩滑。今次食到嘅部位比較肥美、啖啖油香，不過點埋佢哋配嘅薄荷醬之後，清新嘅薄荷香氣即刻中和晒羊脂嘅油膩感，非常加分！ 🐷 豬仔骨配酸黃瓜 一上枱勁熱辣辣，熱氣騰騰！外皮燒到微脆，肉質唔會柴。而且佢個豬仔骨醬汁帶有少少微辣，邊食邊咬開胃酸黃瓜，非常惹味！ 🍹 開心果堅果奶酒 開心果控必點！層次好豐富，base用咗開心果奶酒做底，再加入鮮奶調配，最後表面撒滿開心果碎。入口除咗有濃郁嘅奶香，仲帶有陣陣堅果風味，啖啖都有脆口嘅果碎，口感一流！ 🍝 滿滿蜆肉蝴蝶粉：蜆肉份量毫不手軟，蝴蝶粉掛汁力足。 🍨西班牙油炸鬼配開心果雪糕 最後叫埋呢個甜品，外脆內軟嘅西班牙油炸鬼一定要配埋個雪糕一齊食，熱辣辣嘅Churros加埋冰涼嘅開心果雪糕，那種冰火交融嘅感覺簡直係完美句號！

Lisa T 4 個月前

店舖是朋友之前無意中經過發現的，趁著和朋友慶祝生日，決定前來一試，結果十分驚喜！ • 牛油果芒果蟹肉他他、蟹肉蟹餅：清新開胃 • 半熟刺身紅蝦卷卷意粉：蝦肉鮮甜好好味 • 無花果火腿披薩：餅底香脆 • 黑毛豬鞍架配火腿脆片：爽口不油膩 • 西班牙油炸鬼：剛剛好的口感，糖不會過多 • 提拉米蘇：濃郁滑順，餅乾軟硬度剛剛好 適合朋友，情侶聚會。 用心經營的本地小店值得支持！ 今次晚餐體驗極佳，期待下一次午餐時間，或晚飯時間提前再來，嘗試其他未解鎖的餐品。

Falav 4 個月前

空間唔算太大，橙色作為主色，裝潢走復古路線 。 掃二維碼落單，餐碟配上靚靚餐紙，等食中。 健康一點綠，有呢客青瓜牛油果梨子沙律 ($88)。青瓜切粒再加入壓碎牛油果，梨子片放上面，完成。 入口發現有黑椒碎，少少辛辣，口感爽中又食到牛油果嘅香滑感。 呢杯貴妃荔枝綠茶 ($78)，睇名以為就咁荔枝綠茶，少年太年輕了，加咗酒變成Cocktail類，飲落淡淡酒香味，繼而有荔枝香甜及綠茶味，冰涼舒爽。 老闆推介鐵板油泡黑安格斯封門柳配酸種麵包 ($218)，話得到幾多客嘅正評。 上枱後，侍應再淋上自家製蒜油，即時蒜香味四溢。封門柳有成10安士，想熟D可以再用鐵板煎一煎。 肉質超嫩滑，肉味幾出，無多餘脂肪，好正呀; 酸種麵包又可以放係鐵板上，烘一烘同時又可沾上蒜油食，無得輸呀。 呢客滿滿蜆肉蝴蝶粉 ($118)，絶對無改錯名，真係好多蜆肉。 九成九蜆肉都開口，蜆肉雖然細隻但幾鮮甜，偶爾食到幾隻有沙; 個蝴蝶粉口感煙韌帶點嚼口，唔係淋到黏埋一堆，配埋個白汁一齊食，好好味喎。 食緊牛肉又諗起薯條，即刻將呢客黑松露和帕瑪森起司炸薯條 ($48)加單。 芝士碎落在熱辣金黃薯條上，單食已經夠好味; 點埋個黑松露醬一齊食，就係咁……一條接一條。 甜品時間又到，目測呢客西班牙油炸鬼配雪糕 ($58)出鏡率高。幾款雪糕口味選一球，點咗開心果味，入口超香開心果味，原來係自家製; 條油炸鬼咬落香脆，面層灑滿砂糖再唧朱古力漿，簡直係邪惡軸心。

za zaber 6 個月前

今日去咗太子呢間 **The Steakhaus**，裝修真係幾高質！橙色磁磚牆襯埋柔和燈光，成個 vibe 非常復古，真係好有情調。無論係同朋友嚟 chill 定係同另一半約會，嗰種氣氛都係一流，打卡位超多！📸 餐點方面真係幾驚喜： 🍱 主食系列 火箭安格斯牛扒芝士三文治 呢個三文治係用個復古木盒裝住上枱，一打開真係儀式感滿分！牛扒熟度啱啱好，仲保持到肉汁，配埋芝士同火箭菜，啖啖都好滿足 開心果青醬安格斯封門柳 封門柳肉質好軟腍，牛味夠濃。最驚喜係上面嗰層開心果青醬，堅果嘅香氣令到層次提升咗好多，配埋香脆薯條，真係食到停唔到口！ 明太子牛油果蟹肉卷卷意粉 呢盤嘢真係好重手！明太子醬汁掛晒喺卷卷粉上面，牛油果大大舊又夠滑，蟹肉份量完全唔手軟，每一啖都好濃郁奶香 🍟 小食同甜品 士拉差雞翼 酸酸辣辣咁，炸得夠脆，非常開胃 朱古力布朗尼配雪糕 我哋試咗開心果味同朱古力味嘅 Gelato，Brownie 質地好紮實，配埋透心涼嘅雪糕，成餐飯完美 ending 🍹 特色飲品 呢度連杯嘅設計都好精緻，影相好靚： 開心果拿鐵 (凍) 開心果控必點，香氣好突出 鐵觀音奶茶配咖啡凍 茶味清清地，入面啲咖啡凍增加咗口感，好特別 玉桂蘋果綠茶 淡淡嘅玉桂味同蘋果嘅甜味好夾，飲落好舒服 📍 The Steakhaus 地址：旺角太子道西91號地下（太子站行 3 分鐘就到） #旺角美食 #太子美食 #TheSteakhaus #香港食評 #情調餐廳 #牛扒三文治 #開心果控 #香港探店 #IG食評 #約會餐廳 #意粉控